Հայաստանում չգրանցված ԼՂ ընկերությունները չեն կարող խուսափել ՀՀ ֆինանսական կազմակերպություններում առկա վարկային, գրավի պարտավորություններից, փետրվարի 26-ին Ազգային ժողովի պետական-իրավական հարցերի մշտական հանձնաժողովում հայտարարել է ԿԲ նախագահ Արմեն Նուրբեկյանը։ Նա հստակեցրել է, որ խոսքը 30-40 խոշոր ընկերության մասին է, որոնք ՀՀ-ում գրանցված կազմակերպություններում պարտավորություններ ունեն։
Հանձնաժողովը դրական եզրակացություն է տվել Կենտրոնական բանկի՝ «ՀՀ քաղաքացիական օրենսգրքում լրացումներ կատարելու մասին» օրենքի լրամշակված նախագծին, որով առաջարկվում է Քաղաքացիական օրենսգրքի 247-րդ հոդվածը լրացնել նոր՝ 3-րդ մասով, որը ԼՂ ընկերություններին չի ազատում վարկային և գրավից բխող պարտավորություններից՝ անկախ նրանցից, ՀՀ-ում գրանցված են, թե ոչ։
ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը նշել է, որ ՀՀ-ում չգրանցված ընկերություն լինելու հանգամանքը չի կարող պատասխանատվությունից և պարտավորություններից խուսափելու հիմք հանդիսանալ։
«Այն կանոնակարգումները, որոնք նախատեսել ենք, նպատակ են հետապնդում ապահովել անհրաժեշտ գործունեության դաշտ Լեռնային Ղարաբաղի իրավաբանական ընկերություններին ՀՀ-ում։ Նպատակն այն է, որպեսզի նրանք կարողանան բնականոն շարունակել իրենց գործունեությունը: Բայց այդ, կանոնակարգումները որևիցե եղանակով ուղղված չեն նրան, որ որևէ ընկերություն խուսափի պատասխանատվությունից, որովհետև իրավախախտումից իրավունք չի կարող ծնվել: Եվ այն բոլոր պարագաներում, երբ ունենք իրավիճակ, երբ առկա է փաստացի պարտավորություն, այդ թվում՝ գրավով ապահովագրված, դրանք պետք է կատարվեն: Սա կարևոր նախաձեռնություն է, և մենք պետք է ելնենք այն կանխավարկածից, որ ՀՀ-ում չգրանցվելը չի կարող պարտավորությունների կատարումից չարամտորեն խուսափելու հիմք հանդիսանալ»,- մանրամասնել է Վարդանյանը։
Նուրբեկյանը հավելել է, որ նախագիծը նպատակ ունի ստեղծված իրավիճակում ֆինանսական կազմակերպություններին և Հայաստանի կառավարությանը հնարավորություն տալ իրացնել գրավի իրենց իրավունքը, ինչպես նաև զերծ պահել ֆինանսական համակարգը հնարավոր բացասական հետևանքների ազդեցությունից:
Նախագիծը կընդգրկվի ԱԺ առաջիկա նիստերի օրակարգի նախագծում:
Մանրամասները՝ տեսանյութում։
Տես նաև Armenia Today-ի՝ «Բարձր հարկեր և աջակցության բացակայություն. ի՞նչ դժվարություններ ունի արցախյան բիզնեսը Հայաստանում» ռեպորտաժը։
