Ադրբեջանը նախատրաստական աշխատանքներ է իրականացնում Ղազախստանի Ակտաու օդանավակայանի մոտ վթարի ենթարկված AZAL ինքնաթիռի հարցով միջազգային դատարան դիմելու համար, հայտնում են ադրբեջանական լրատվամիջոցները։
Ըստ նրանց՝ «չնայած բոլոր փաստերի, ապացույցների առկայությանը, Ռուսաստանի փորձերը՝ հետաքննությունը շեղել և մեղքը բարդել անձնակազմի վրա, խորապես ցավալի են»։ Նշվում է, որ Ադրբեջանն ունի ինքնաթիռը խոցած «Պանցիր-Ս» հրթիռի բեկորներ։
Ադրբեջանական ԶԼՄ-ները նաև նշել են, որ Ռուսաստանի հետ երկխոսության դռները բաց են, «Մոսկվան պետք է բացահայտ ընդունի իր մեղքը և պատասխանատվություն կրի, հակառակ դեպքում՝ Բաքուն պատրաստ է հաջորդ քայլերին»։
Փետրվարի 4-ին Ղազախստանի տրանսպորտի նախարարությունը հրապարակել էր ավիավթարի պատճառների հետաքննության նախնական զեկույցը։
2024թ․ դեկտեմբերի 25-ին Բաքու-Գրոզնի չվերթն իրականացնող ադրբեջանական ավիաընկերության ինքնաթիռը վթարի էր ենթարկվել Ղազախստանի արևմտյան Ակտաու օդանավակայանի մոտ։ Ինքնաթիռում 62 ուղևոր և անձնակազմի 5 անդամ էին։ Ավիավթարի հետևանքով 38 մարդ էր մահացել, 29 փրկվածներ հոսպիտալացվել էին։
Ավելի ուշ ադրբեջանական և արևմտյան մի շարք լրատվամիջոցներ հայտնել էին, որ կործանման պատճառն արձակված ռուսական «երկիր-օդ» հրթիռն էր, որի բեկորները պայթել էին ինքնաթիռի կողքին։ Դեկտեմբերի 28-ին ՌԴ նախագահ Վլադիմիր Պուտինն Ադրբեջանի նախագահ Իլհամ Ալիևի հետ զրույցում ներողություն էր խնդրել ՌԴ օդային տարածքում AZAL ինքնաթիռի հետ կապված միջադեպի համար։ Դեկտեմբերի 29-ին Ալիևը Ռուսաստանից պահանջել էր ընդունել իր մեղքն ադրբեջանական ինքնաթիռի կործանման մեջ։
