Գործատուների հանրապետական միությունը մտահոգություն է հայտնել ԶՊՄԿ-ի աշխատակիցների գործադուլի մասին։ Այն մեկնարկել էր հունվարի 31-ին։ Աշխատակիցները պահանջել էին աշխատավարձերի 50%-ով բարձրացում և վերադասի հետ բաց երկխոսության ապահովում:
Ըստ միության՝ աշխատակիցների նախաձեռնած գործադուլն անօրինական է՝ Աշխատանքային օրենսգրքի 74 հոդվածի կոպիտ խախտումներով, ինչը բերել է երկրի թիվ մեկ հարկատուն հանդիսացող խոշորագույն ընկերության բնականոն գործունեության խաթարմանը։
«Նման նախաձեռնությունը չի բխում նաև աշխատավորների շահերից, քանի որ ԱՕ 78 հոդվածով սահմանված կարգով գործադուլը անօրինական ճանաչվելու դեպքում 82 հոդվածի համաձայն գործադուլին մասնակցած աշխատողները գործատուին պատճառված վնասի համար կրելու են համապարտ պատասխանատվություն»,- նշել են միությունից:
Գործատուների միությունը կոչ է արել բոլոր բողոքավոր աշխատավորներին վերադառնալ բնականոն աշխատանքի, գնալ կառուցողական բանակցությունների, գտնել փոխզիջումներ և խոչընդոտ չդառնալ գործատու ընկերության գործունեությանը, իսկ բանակցությունների արդյունքում համաձայնության չգալու դեպքում գործադուլի նախաձեռնություն սկսել օրինական ճանապարհով։
Միությունը նշել է, որ գործադուլ անող աշխատակիցների պատճառով տուժում է ոչ միայն կոմբինատն ու մյուս աշխատակիցները, այլև երկրի տնտեսությունը։
«Հարյուրավոր ընկերություններ և կազմակերպություններ՝ իրենց հազարավոր աշխատակիցներով, կապված են ԶՊՄԿ-ի հետ և մի խումբ մարդկանց չարտոնված բողոքի պատճառով վնաս է կրում ԶՊՄԿ-ին առնչվող ամբողջ տնտեսական շղթան»,- ասված է հայտարարության մեջ։
Կոմբինատի մամուլի խոսնակ Արայիկ Մարգարյանը փետրվարի 1-ին Armenia Today-ին հայտնել էր, որ աշխատակիցների բողոքի ակցիայի պատճառ է հանդիսացել ԶՄՊԿ-ի աշխատավարձերի համահարթեցման գործընթացը։
Կոմբինատը հանդես էր եկել հայտարարությամբ՝ ընդգծելով, որ մի շարք աշխատակիցներ չեն ներկայացել աշխատանքի, չեն կատարել իրենց աշխատանքային պարտականությունները կամ լքել են իրենց աշխատատեղերը` վերջնագրային կերպով պահանջելով աշխատավարձի անիրատեսական բարձրացում:
ԶՊՄԿ-ն 2024 թվականի արդյունքներով գլխավորել էր Հայաստանի 1000 խոշոր հարկատուների ցանկը։ 2024 թվականի դեկտեմբերին վարչապետ Նիկոլ Փաշինյանը հայտարարել էր, որ ԶՊՄԿ-ն ՀՀ պետական բյուջե էր փոխանցել 33,25 մլրդ դրամ՝ որպես կառավարության շահաբաժին։
