Հայաստանի մրցակցության պաշտպանության հանձնաժողովը հասարակության մոլորեցման դրսևորումներով անբարեխիղճ մրցակցության համար «Գլոբբինգ»-ի («Գլոբալ Շիփփինգ» ՍՊԸ) նկատմամբ շուրջ 53 մլն դրամի տուգանք է նշանակել, հայտնում են հանձնաժողովից։ Նշել են, որ ընկերությունն արտերկրից իրականացրած գնումները չի առաքել քաղաքացիներին հայտարարած ժամկետներում։
«Չինաստանից ՀՀ օդային առաքումների համար «5-10 աշխատանքային օր» ժամկետ հայտարարելու պարագայում 2022 թվականի հունվարի 1-ից մինչև 2023 թվականի ապրիլի 25-ն ընկած ժամանակահատվածում Չինաստանից ՀՀ իրականացված օդային առաքումների ընդհանուր թվի առնվազն 26%-ն առաքվել է հայտարարված տասնօրյա առավելագույն ժամկետի խախտմամբ։ Ընկերությունը նշված ծառայության համար կայքի գլխավոր էջում «5-10 աշխատանքային օր» ժամկետ սահմանելու պարագայում նույն կայքի «Ընդհանուր դրույթներ և պայմաններ» բաժնում նշել է, որ հայտարարված փոխադրման ժամկետները պայմանական են և դրանց խախտման համար Globbing-ը որևէ պատասխանատվություն չի կրում։ Այսինքն կայքի տարբեր բաժիններում նշվել են իրար հակասող պայմաններ»,- մանրամասնել են հանձնաժողովից։
«Գլոբբինգ»-ը միջազգային օնլայն գնումների հարթակ է, որը հնարավորություն է տալիս օգտվել օնլայն գնումների բոլոր առավելություններից և կատարել գնումներ 8 երկրից՝ ԱՄՆ, Անգլիա, Գերմանիա, Չինաստան, Դուբայ, Իտալիա, Հունաստան և ՌԴ։ «Գլոբալ Շիփփինգ» ՍՊԸ-ն Հայաստանում հիմնել են 2017-ին։
