«Քաղաքացիական պայմանագիր»-ը դժգոհ է առողջության ապահովագրության ծրագրից, ինչի մասին կուսակցության ներկայացուցիչները խոսել են հուլիսի 5-ի վարչության նիստում, հայտնել է «Հրապարակ»-ը։
«Առողջապահության թեմայով բավականին բուռն քննարկում է ծավալվել, ՔՊ-ականները դժգոհել են նախարարության ներկայացրած պարտադիր ապահովագրության ծրագրից՝ բազմաթիվ խութեր ու վտանգներ մատնանշելով»,- գրել է թերթը։
Ծրագիրն այս տարվա հուլիսից կգործի հանրության որոշ խմբերի համար, իսկ ամբողջությամբ ուժի մեջ կմտնի 2027 թվականից։
Կուսակցության ներկայացուցիչները թանկ են համարում ապահովագրությունը, որն Առողջապահության նախարարությունը գնահատել է 200 հազար դրամ (500 դոլար) և կարծում են, որ դա կարող է դժգոհություն առաջացնել հասարակության շրջանում։
«Նախարարը տեղեկացրել է, որ յուրաքանչյուր քաղաքացի, իրենց հաշվարկով, տարեկան շուրջ 200 000 դրամ կվճարի` որպես պարտադիր ապահովագրության վճար։ ՔՊ-ականներից մի քանիսն առարկել են, որ գերատեսչության կատարած հաշվարկը, մեղմ ասած, ուռճացված է, քանի որ տարեկան կտրվածքով մեկ մարդու բուժզննության և թեթև հիվանդությունների բուժման համար մի քանի անգամ պակաս ծախս կպահանջվի, սակայն նախարարն իրենն է պնդել»,- գրել է թերթը։
Ըստ լրատվամիջոցի՝ ՔՊ-ականները կրկին հակադարձել են՝ զգուշացնելով, որ նման բարձր շեմ սահմանելը հերթական բողոքի ալիքն է բարձրացնելու, և այդ բողոքը կլինի օբյեկտիվ, ինչպես հանրային տրանսպորտի ուղեվարձի թանկացման պարագայում էր, քանի որ ցայսօր էլ 100 դրամ ուղեվարձով գծատերերը մեծ շահույթներ են ստանում։
Կառավարությունը 2023 թվականի փետրվարի 2-ին հավանություն էր տվել Հայաստանում առողջության համապարփակ ապահովագրություն ներդնելու հարցին։
2024 թվականին առողջապահական ապահովագրության համակարգի մասնակից կդառնան հաշմանդամություն ունեցող, նպաստ ստացող սոցիալապես անապահով քաղաքացիները, սոցիալական փաթեթից օգտվող քաղաքացիական ծառայողները, անչափահաս քաղաքացիները։ 2025 թվականից դրան կմիանան սոցիալական փաթեթից չօգտվող պետական հատվածի աշխատողները և թոշակառուները, 2026 թվականից՝ մասնավոր հատվածի աշխատողներն ու ֆերմերները, իսկ 2027 թվականից՝ ծրագրի մյուս բոլոր մասնակիցները։
