Ադրբեջանի իշխանություններն առգրավել են Արցախում մնացած հայերի հայկական անձնագրերը, բայց նրանց ադրբեջանական անձնագրեր չեն տրամադրել, հայտնում է լրագրող Լինդսի Սնելը, որն Ադրբեջանի կողմից Լեռնային Ղարաբաղի վրա հարձակումից և էթնիկ զտումից մեկ ամիս անց խոսել է Արցախում մնացած քիչ մարդկանցից մեկի դստեր հետ:
Արցախի բնակչուհու դուստրն ասել է, որ իր հայրը ցանկացել է վերաինտեգրման ականատես դառնալ։ Հարազատները սպասում են նրա վերադարձին։
«Ես նրան ասացի, որ ԼՂ հայերը կարող են «կենդանաբանական այգում կապիկ դառնալ Բաքվի համար, որպեսզի որպես ցուցանմուշ ցույց տան բոլոր տեսակի Կարմիր խաչերին, ՄԱԿ-ին և լրագրողներին»,- ասել է նա։
Աղջիկը պատմել է, որ հոկտեմբերի 1-ից «Ղարաբաղ Տելեկոմը» դադարել է գոյություն ունենալ, կապ չի եղել, 5-6 օր անց առաջին անգամ Կարմիր խաչի ներկայացուցչի օգնությամբ Wi-Fi-ով՝ մեսենջերով, հայրը կարողացել է զանգահարել։
«Շաբաթը մեկ անգամ զանգում է, խոսակցությունը տևում է 5-10 րոպե, ասում է՝ ամեն ինչ լավ է, ավելին ոչինչ չի կարող ասել, որովհետև մոտակայքում միշտ ինչ-որ մեկը կա, նա չի խոսում իրավիճակի մասին, քանի որ նույնիսկ տեսազանգով խոսելիս մոտակայքում մարդիկ կան՝ ոչ հայ, ոչ եվրոպացի, ոչ ռուս»,- պատմել է նա:
Լրագրողին զրուցակիցը պատմել է նաև, որ Ադրբեջանի իշխանություններն առգրավվել են հայերի անձնագրերը՝ փոխարենը չտրամադրելով ադրբեջանական։ Երբ կտան՝ հայտնի չէ։ Նա նաև նշել է, որ այս պահին ԼՂ-ում դժվար թե լինեն 100 հայեր և որ Ստեփանակերտում նրանց թիվը մոտ 30-40 է։ Քաղաքը դատարկ է, որում շրջում են ոստիկանները։
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Վերջին տվյալներով՝ Արցախի դեմ ադրբեջանական ագրեսիայի հետևանքով կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։
Մանրամասները՝ տեսանյութում։
