Մոսկվայի Տվերսկայա փողոցում գտնվող «Արմենիա» խանութ-ռեստորանի տարածքի մի մասը կզբաղեցնի «ՎկուսՎիլ» (ВкусВилл) սուպերմարկետը։ Միևնույն ժամանակ, խանութ-ռեստորանը կշարունակի իր գործունեությունը և չի պատրաստվում փակվել։ Այս մասին ՌԲԿ-ին հայտնել է հաստատության գլխավոր տնօրեն Արտակ Ալավերդյանը:
Ավելի վաղ «ՎկուսՎիլ»-ը տեղեկացրել էր «Արմենիա» խանութ-ռեստորանի տեղում սրճարանային գոտիով խանութ բացելու մասին։ Հետագայում ընկերությունը հստակեցրել է, որ նոր խանութը կտեղակայվի 184 քառակուսի մետր մակերեսի վրա և կզբաղեցնի ռեստորանի տարածքի միայն մի մասը։
Այս հաղորդագրությունների ֆոնին լրատվամիջոցներում տեղեկություններ էին տարածվել խանութ-ռեստորանի հնարավոր փակման մասին, սակայն Ալավերդյանը դրանք անվանել է իրականությանը չհամապատասխանող։ Նա ընդգծել է, որ փակման ոչ մի պլան չկա, և խանութն ու ռեստորանն աշխատում են բնականոն հունով՝ գործող գրաֆիկի համաձայն։
«Արմենիա» խանութ-ռեստորանը բացվել է 1952 թվականին՝ որպես Հայկական ԽՍՀ ֆիրմային գաստրոնոմ։ ԽՍՀՄ փլուզումից հետո տարածքն անցել է Մոսկվայի կառավարության սեփականությանը և վարձակալությամբ հանձնվել մասնավոր ընկերության։ 2006-2011 թվականներին օբյեկտը վերակառուցվել է, ինչի արդյունքում առևտրային տարածքը կրճատվել է, և այնտեղ բացվել է սրճարան։
