Երևանում ավտոբուսների համար երբևէ ձմեռային անվադողեր ձեռք չեն բերվում, հայտնել է Երևանի ավագանու «Քաղաքացիական պայմանագիր» խմբակցության ղեկավար Արմեն Գալջյանը։
Նա այսպես է պատասխանել Երևանի նախկին քաղաքապետ Հայկ Մարությանի այն հայտարարությանը, որ ավտոբուսերը կանգնած են փողոցների չմաքրված լինելու և ձմեռային անվադող չունենալու պատճառով։
Գալջյանը նշել է, որ ավտոբուսների համար նախատեսված են համասեզոնային անվադողեր։ Ըստ նրա՝ Երևանի քաղաքապետարանի բոլոր պատկան ստորաբաժանումներն առավոտվանից և մինչ այժմ շարունակում են աշխատանքները մայրաքաղաքի փողոցների և բակերի անցանելիությունն ապահովելու ուղղությամբ։
Երևանում առատ ձյուն է տեղում, ինչի հետևանքով խցանումներ են առաջացել, հանրային տրանսպորտը նորմալ չի աշխատում։ Մարդիկ ժամերով կանգնած են մնում կանգառներում կամ ոտքով են տեղաշարժվում։
