ԱՄՆ-ը կարող է ներմուծել մինչև 15,000 դոլարի գրավ որոշ տուրիստական և գործարար վիզաների համար։ Այս քայլը կլինի երկու շաբաթից մեկնարկող փորձնական ծրագրի մի մաս, հայտնում է Reuters գործակալությունը։ Ծրագրի նպատակն է կրճատել այն արտասահմանցիների թիվը, ովքեր մնում են ԱՄՆ-ում վիզայի ժամկետի ավարտից հետո։
Ըստ կանոնների՝ ամերիկյան հյուպատոսներին կտրվի իրավունք` պահանջելու գրավ այն երկրների քաղաքացիներից, որոնց մոտ հաճախ են արձանագրվում վիզային ռեժիմի խախտումներ։ Նման քայլը կարող է վերաբերվել նաև այն պետությունների քաղաքացիներին, որոնց տեղեկատվությունը ստուգումների և վերահսկման վերաբերյալ համարվում է ոչ բավարար։
Ծրագիրը կմեկնարկի օգոստոսի 20-ից և կտևի մոտ մեկ տարի։ Հյուպատոսներին կառաջարկվեն գրավի երեք ֆիքսված չափեր՝ 5000, 10,000 և 15,000 դոլար։ Ակնկալվում է, որ առավել հաճախ կիրառվելու է առնվազն 10,000 դոլարի չափով գրավը։
Հիշեցնենք, որ ԱՄՆ նախագահ Դոնալդ Թրամփը միգրացիոն քաղաքականության դեմ ուղղված բողոքների ֆոնին հայտարարել էր Լոս Անջելեսում, Չիկագոյում և Նյու Յորքում՝ ավանդաբար Դեմոկրատական կուսակցությանը աջակցող քաղաքներում, անօրինական միգրանտների ձերբակալության և արտաքսման գործողությունների ընդլայնման մասին։
