Ժնևում ավարտվել է Իրանի և եվրոպական երեք երկրի միջև բանակցությունների առաջին փուլը, հայտնում է Tasnim-ը։
Նշվում է, որ Իրանի ԱԳ նախարար Աբբաս Արաղչին Ժնևում բանակցություններ է անցկացրել Գերմանիայի, Մեծ Բրիտանիայի և Ֆրանսիայի իր գործընկերներ Յոհան Վադեպֆուլի, Դեյվիդ Լամի, Ժան-Նոել Բարոյի և Եվրամիության գլխավոր դիվանագետ Կայա Կալլասի հետ՝ միջուկային խնդրի և Իրանի դեմ Իսրայելի ռազմական ագրեսիայից հետո տարածաշրջանում տեղի ունեցած վերջին իրադարձությունների վերաբերյալ:
Ըստ գործակալության՝ իրանական կողմն ընդգծել է, որ միայն ագրեսիան կանգնեցնելով կարելի է ազնիվ գործընթացի հիման վրա բացել դիվանագիտության ճանապարհը։
«Իրանը պատրաստ է դիտարկել դիվանագիտությունը, եթե ագրեսիան դադարի, իսկ ագրեսորը պատասխանատվության ենթարկվի իր հանցագործությունների համար: Այս կապակցությամբ հստակ հասկացրել եմ, որ Իրանի պաշտպանական հնարավորությունները քննարկման ենթակա չեն»,- բանակցություններից հետո հայտարարել է Արաղչին։
Իրանական բանակցային խումբը նաև նշել է, որ Իրանը չի լքել բանակցությունների սեղանը, և որ այդ բանակցությունները երկխոսության ավարտը չեն:
ԵՄ դիվանագիտական ծառայության ղեկավարը հայտնել է, որ Ժնևում պայմանավորվել են շարունակել բանակցությունները, «քննարկել են ավելին, քան միջուկային խնդիրը»։
Իսրայելի և Իրանի միջև ութերորդ օրն է՝ շարունակվում են ռազմական գործողությունները։ Առաջին հարվածը հասցրել էին Իսրայելի ռազմաօդային ուժերը հունիսի 13-ի գիշերը՝ թիրախավորելով Իրանի ռազմական և արդյունաբերական օբյեկտները, որից հետո կողմերն ամեն օր փոխանակվում են հրթիռային հարվածներով, որոնք մարդկային զոհերի ու ավերածությունների պատճառ են դարձել։
