Իսրայելը քննարկում է Իրանի դեմ ռազմական հարվածի հնարավորությունը՝ ամենայն հավանականությամբ առանց ԱՄՆ-ի աջակցության, հայտնում է ամերիկյան NBC news-ը՝ հղում անելով իրավիճակին ծանոթ հինգ աղբյուրի։
Նման որոշումը, ըստ հրապարակման, պայմանավորված է այն հանգամանքով, որ ԱՄՆ-ն և Իրանը մոտ են նախնական կամ շրջանակային համաձայնագրի ձեռքբերմանը՝ կապված Թեհրանի հարստացված ուրանի ծրագրի սահմանափակման հետ, որի մեջ Իսրայելը վտանգ է տեսնում:
«Իսրայելի միակողմանի հարվածը կլինի լուրջ խզում ԱՄՆ-ի հետ հարաբերություններում, քանի որ Թրամփի վարչակազմը դեմ է նման քայլի։ Միևնույն ժամանակ, ԱՄՆ-ն սպասում է Իրանի պատասխանին առաջարկված միջուկային շրջանակային համաձայնագրի վերաբերյալ, իսկ նախագահ Թրամփը հրապարակայնորեն դժգոհել է Թեհրանի կոշտ դիրքորոշումից», – գրել է NBC news-ը։
ԱՄՆ վարչակազմն անվտանգության նկատառումներով հանձնարարել է տարածաշրջանում՝ իրանական հրթիռների և ռազմական տեխնիկայի սահմանների մոտ գտնվող բոլոր դեսպանատներին գնահատել հնարավոր վտանգները և միջոցներ ձեռնարկել՝ ամերիկացիներին և ենթակառուցվածքներին պաշտպանելու համար։
Միացյալ Նահանգները հունիսի 12-ին հայտնել է, որ նախապատրաստում է Իրաքում իր դեսպանատան մասնակի տարհանումը՝ տարածաշրջանում անվտանգության ռիսկերի ավելացման պատճառով:
2024 թվականի հոկտեմբերի 1-ին Իրանը զանգվածային հրթիռային հարձակում էր իրականացրել Իսրայելի վրա։ Իսրայելի վարչապետ Բենիամին Նեթանյահուն հայտարարել էր, որ Իրանը պատասխան կստանա։ Հոկտեմբերի 26-ին Իսրայելի պաշտպանության բանակը հայտնել էր, որ ավիահարվածներ է արձակել Իրանի վրա երեք փուլով, թիրախավորվել էին հրթիռների արտադրության օբյեկտները: Թեհրանը հայտնել էր երկու զոհի մասին:
