Ռուսաստանում հայազգի գործարար Արեգ Շչեպիխինի առևանգման գործով վեց կասկածյալ գրավի դիմաց ազատ է արձակվել, հայտնում է Baza-ն։
Քննիչները հրաժարվել են գործով մեղադրյալների համար խափանման միջոց կիրառել կալանքի տեսքով, մինչդեռ Շչեպիխինն ինքը կալանավորված է երկու ամսով։ Նրանց մեղադրանք է առաջադրվել «Մարդու առևանգում» (ՌԴ Քրեական օրենսգրքի 126-րդ հոդված) և «Պաշտոնեական լիազորությունների չարաշահում» (ՌԴ Քրեական օրենսգրքի 286-րդ հոդված) հոդվածներով։
Ըստ լրատվականի՝ կասկածյալները պարտավոր են մնալ իրենց բնակության վայրում և հարցաքննության ներկայանալ առաջին իսկ պահանջի դեպքում։
Հունիսի 3-ին Մոսկվայի կենտրոնում՝ Յարոսլավսկի երկաթուղային կայարանի մոտ, մի քանի անձ բռնի ուժով հայ գործարարին թարթող լույսերով մեքենայի բեռնախցիկ էր նստեցրել և առևանգել: Տղամարդն օգնություն էր կանչել և խնդրել ոստիկանություն զանգահարել: Ըստ Չեչնիայի իշխանությունների՝ գործարարը չի առևանգվել, այլ «ձերբակալվել է իրավապահ մարմինների աշխատակիցների կողմից»։
Հունիսի 4-ին ՌԴ ՔԿ-ն քրեական գործ էր հարուցել միջադեպի կապակցությամբ։ Գործով 6 անձ էր ձերբակալվել։ Շչեպիխինին մեղադրանք էր առաջադրվել ազգային ատելության հրահրման հոդվածով: Հունիսի 6-ին Մոսկվայի դատարանը երկու ամսով կալանավորել էր Շչեպիխինին։
