Ուկրաինայի նախագահ Վլադիմիր Զելենսկին հայտարարել է, որ պատրաստ է եռակողմ հանդիպման Ռուսաստանի նախագահ Վլադիմիր Պուտինի և ԱՄՆ նախագահ Դոնալդ Թրամփի հետ, հայտնել է France24-ը:
«Եթե Պուտինը չի ցանկանում երկկողմ հանդիպում, կամ եթե բոլորն ուզում են եռակողմ հանդիպում, ես դեմ չեմ։ Ես պատրաստ եմ ցանկացած ձևաչափի»,- երեքշաբթի լրագրողներին ասել է Զելենսկին։
Նա հայտնել է նաև, որ խաղաղության բանակցությունների համար հաջորդ հանդիպման ամենաիրատեսական վայրերն են Թուրքիան, Շվեյցարիան և Վատիկանը: Զելենսկին տեղեկացրել է, որ Ռուսաստանը Բելառուսն է առաջարկել որպես բանակցությունների վայր, սակայն Կիևը դա ընդունելի չի համարում:
ԱՄՆ նախագահը մայիսի 26-ին քննադատել էր ռուս և ուկրաինացի պաշտոնակիցներին: Կրեմլն արձագանքել էր ԱՄՆ նախագահի դժգոհություններին։ Ռուսաստանի առաջնորդի մամուլի քարտուղար Դմիտրի Պեսկովը հայտարարել էր, որ Վաշինգտոնը շատ մեծ ջանքեր է գործադրել Մոսկվայի և Կիևի միջև բանակցություններ սկսելու համար, ինչը ենթադրում է «էմոցիոնալ գերբեռնվածություն»։
