Ուկրաինան և Ադրբեջանը մշտապես աջակցում են միմյանց տարածքային ամբողջականությանը և ինքնիշխանությանը, Բաքվում հայտարարել են Ադրբեջանի նախագահ Իլհամ Ալիևը և Ուկրաինայի ԱԳ նախարար Անդրեյ Սիբիգան, հայտնում են տեղական լրատվամիջոցները։
Նշվում է, որ Սիբիգան շնորհակալություն է հայտնել Ալիևին «Ադրբեջանի կողմից Ուկրաինայի տարածքային ամբողջականությանը և ինքնիշխանությանն աջակցելու համար»: Ալիևն, իր հերթին, հայտարարել է, որ Բաքուն կշարունակի մարդասիրական օգնություն ցուցաբերել Ուկրաինային:
Ադրբեջանցի գործընկեր Ջեյհուն Բայրամովի հետ հանդիպումից հետո կայացած մամուլի ասուլիսի ժամանակ Սիբիգան հայտարարել է, որ «Ուկրաինայի և Ադրբեջանի միջև ռազմավարական գործընկերության զարգացումը երկու երկրների առանցքային շահն է»:
Բայրամովը հայտնել է, որ Ադրբեջանը միայն պետական խողովակներով Ուկրաինային շուրջ 40 մլն դոլարի մարդասիրական օգնություն է ցուցաբերել: Բացի այդ, բանակցությունների ընթացքում նա Ուկրաինայի ԱԳ նախարարին տեղեկացրել է Հայաստանի և Ադրբեջանի միջև հարաբերությունների կարգավորման գործընթացի մասին:
