ԱՄՆ նախագահ Դոնալդ Թրամփի վարչակազմը մայիսի 22-ի որոշմամբ արգելել է Հարվարդի համալսարանին օտարերկրյա ուսանողներ ընդունել, հաղորդում է CNN-ը:
«Հարվարդն այլևս իրավունք չունի ընդունելու արտասահմանցի ուսանողների, իսկ ներկայումս սովորող օտարերկրյա ուսանողները պետք է տեղափոխվեն այլ հաստատություններ կամ կկորցնեն իրենց օրինական կարգավիճակը»,- ասված է ԱՄՆ ներքին անվտանգության քարտուղարության հայտարարության մեջ։
Նշվում է, որ վարչակազմի պահանջներին չենթարկվելու դեպքում հեղինակավոր հաստատության նկատմամբ կկիրառվի խիստ պատիժ:
CNN-ը գրում է, որ այս որոշումը կարող է անդրադառնալ Հարվարդի ուսանողական կազմի ավելի քան քառորդի վրա, որի զգալի մասը միջազգային ուսանողներ են։
Վերջին ամիսներին Հարվարդը և Թրամփի վարչակազմը լարված հարաբերությունների մեջ են այս և նմանատիպ այլ պահանջների պատճառով: Բուհի ղեկավարությունը, մինչդեռ, պնդում է, որ բազմաթիվ պահանջներ անցնում են դաշնային կառավարության իրավասություններից այն կողմ և կարող են խախտել Հարվարդի սահմանադրական իրավունքները։
Հարվարդն ԱՄՆ այն տասնյակ ուսումնական հաստատություններից է, որոնք բախվում են Թրամփի վարչակազմի նմանատիպ պահանջներին, սակայն այն համարվում է ակադեմիական անկախության ամենակոշտ պաշտպաններից։
