Իրանի նախագահ Մասուդ Փեզեշքիանը քննադատել է ԱՄՆ վարչակազմի բանակցությունների կոչի և Իրանի դեմ սպառնալիքների հակասությունը՝ ընդգծելով, որ Թեհրանը միայն հավասար հիմունքներով կվարի բանակցություններ, գրում է Tasnim-ը։
Մատնանշելով իր ամերիկացի գործընկերոջ՝ Թեհրանի հետ բանակցություններ վարելու ցանկությունը, Իրանի առաջնորդն ասել է, որ «Իրանը հանդես է գալիս հավասար պայմաններով երկխոսության օգտին»:
Միևնույն ժամանակ՝ Փեզեշքիանը մերժել է «Իրանին սպառնալու և, միաժամանակ, բանակցությունների կոչ անելու ԱՄՆ-ի պարադոքսալ քաղաքականությունը»։
«Այսօր ԱՄՆ-ն իրեն նվաստացուցիչ է պահում ոչ միայն Իրանի, այլ ամբողջ աշխարհի նկատմամբ, ինչը հակասում է բանակցությունների պահանջին»,- նշել է Իրանի նախագահը։
Փետրվարին ԱՄՆ նախագահ Դոնալդ Թրամփը հրամանագիր էր ստորագրել Իրանի նկատմամբ առավելագույն ճնշման քաղաքականությունը վերականգնելու մասին։ Ավելի ուշ նա հայտնել էր, որ նամակ է ուղարկել Իրանի գերագույն առաջնորդ Ալի Խամենեիին՝ միջուկային ծրագրի քննարկման առաջարկով։ Խամենեին ասել էր, որ Թեհրանը պատրաստ է պատասխանել ԱՄՆ-ի ցանկացած ագրեսիվ գործողության, ինչպես նաև մերժել էր Վաշինգտոնի հետ բանակցությունների հնարավորությունը։ Մարտին Թեհրանը հայտարարել էր, որ Թրամփին ուղղված պատասխան նամակում հրաժարվել է ուղիղ բանակցություններից, սակայն հայտարարել էր անուղղակի երկխոսության հնարավորության մասին։
