ԱՄՆ նախագահ Դոնալդ Թրամփը հրամանագիր է ստորագրել, ըստ որի՝ TikTok սոցիալական ցանցի գործունեությունը Միացյալ Նահանգներում երկարաձգվում է 75 օրով։
«Իմ վարչակազմը քրտնաջան աշխատանք է տանում TikTok-ը փրկելու գործարքի ուղղությամբ։ Մենք հսկայական առաջընթաց ենք գրանցել: Գործարքը պահանջում է ավելի շատ աշխատանք, այդ իսկ պատճառով ես ստորագրում եմ հրաման՝ TikTok-ը ևս 75 օր հասանելի պահելու մասին»,- Truth Social-ում գրել է ԱՄՆ նախագահը։
Նա հույս է հայտնել, որ կշարունակեն աշխատել Չինաստանի հետ գործարքը կնքելու համար:
ԱՄՆ-ում TikTok-ի արգելափակումը պայմանավորված է 2024 թվականին նախագահ Ջո Բայդենի կողմից ստորագրված օրենքով, ըստ որի չինական ByteDance կորպորացիան պետք է մինչև հունվարի 19-ը TikTok-ը վաճառի ամերիկյան ընկերությանը՝ արգելքից խուսափելու համար։ TikTok-ը հայտնել էր, որ պլատֆորմը կդադարի գործել երկրում հունվարի 19-ից, քանի դեռ այն չի ստանա հստակ երաշխիքներ հեռացող վարչակազմից, որ արգելքը չի հանգեցնի տուգանքների օպերատորի տեխնոլոգիական գործընկերների համար։ Թրամփը հունվարի 19-ին հայտարարել էր, որ հրամանագիր կհրապարակի TikTok ծառայության արգելքը հետաձգելու մասին։
