Երկկողմանի թոքաբորբով տառապող Հռոմի պապ Ֆրանցիսկոսի վիճակը ծանր է, բայց կայուն, հայտնում է ՏԱՍՍ-ը՝ հղում անելով Սուրբ Աթոռի մամուլի ծառայությանը։
«Հռոմի պապի վիճակը շարունակում է մնալ ծանր, բայց կայուն, սուր շնչառական նոպաների կրկնություն չի գրանցվել»,- ասվում է հաղորդագրության մեջ։
Նշվում է, որ արյան մի քանի պարամետրեր կայուն են։ Ըստ հաղորդագրության՝ պապը վերադարձել է աշխատանքի։
Այսօր ավելի վաղ Վատիկանը հայտնել էր Հռոմի պապի վիճակի բարելավման մասին։
88-ամյա Ֆրանցիսկոսի ինքնազգացողությունը վատացել էր փետրվարի 17-ին։ Նա հոսպիտալացվել էր բրոնխիտով և տեղափոխվել Հռոմի Ջեմելի հիվանդանոց: Պապի մոտ երկկողմանի թոքաբորբ էր ախտորոշվել։ Փետրվարի 22-ին կարդինալ Ջանֆրանկո Ռավասին չէր բացառել, որ Հռոմի պապը կարող է հրաժարվել աթոռից, եթե առողջական խնդիրները խանգարեն նրան կատարել պարտականությունները։
