Սաուդյան Արաբիան պատրաստակամություն է հայտնել երկրում ընդունել Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հանդիպումը։
Այս մասին ասվում է Թագավորության արտաքին գործերի նախարարության հայտարարության մեջ, որը հրապարակվել է X սոցիալական ցանցում։ Նման միտք նախկինում հնչեցրել էր Թրամփը։
«Թագավորությունը ողջունում է գագաթնաժողովը Սաուդյան Արաբիայում հյուրընկալելու հնարավորությունը և վերահաստատում է իր հանձնառությունը Ռուսաստանի և Ուկրաինայի միջև խաղաղության հասնելու շարունակական ջանքերին»,- ասվում է հայտարարության մեջ:
Արտաքին գործերի նախարարությունը հիշեցրել է, որ Սաուդյան Արաբիան ավելի վաղ առաջարկել էր իր միջնորդական ծառայությունները Մոսկվային և Կիևին՝ ճգնաժամի քաղաքական կարգավորմանը նպաստելու համար։
Թրամփն ու Պուտինը հեռախոսազրույց էին ունեցել փետրվարի 12-ին։ Զրույցից հետո Թրամփը հայտնել էր, որ Պուտինի հետ պայմանավորվել է բանակցային գործընթաց սկսել Ուկրաինայում հակամարտությունը դադարեցնելու համար։
