Իսրայելական Jerusalem Post թերթը, որի հոդվածագիրները նախկինում հանդես էին գալիս Հայաստանին Իսրայելի աջակցության օգտին, հոդված է հրապարակել հակառակ ուղերձով։
Հոդվածի հեղինակ Մորդեխայ Քեդարը գրում է, որ Իսրայելը պետք է ակտիվորեն աջակցի Ադրբեջանին Հայաստանի հետ հակամարտությունում, հատկապես՝ «Զանգեզուրի միջանցքի» վերահսկողության հարցում։ Այս երթուղին կարող է թուլացնել Թեհրանի ազդեցությունը տարածաշրջանում, շեշտում է հոդվածագիրը։
Հեղինակը հիշեցրել է, որ Ադրբեջանն Իսրայելի առանցքային դաշնակիցն է՝ նավթի մատակարարման, իսրայելական զենք գնելու և Իրանի դեմ գործողությունների հնարավորություններ ընձեռելու առումներով։
«Այս գործընկերության ամրապնդումն ապահովում է ոչ միայն Իսրայելի անվտանգությունը, այլև բարձրացնում է նրա կարգավիճակը միջազգային հարթակում»,- նշվում է հոդվածում։
Ադրբեջանին աջակցելը, գրում է Քեդարը, ոչ միայն ռազմավարական շահերին համահունչ քայլ է, այլև կրիտիկական պահին Իսրայելի հավատարմության ցուցադրումն իր դաշնակիցներին։
Հունվարին Jerusalem Post-ի սյունակագիրներ Դեն Փերին և Գիլադ Շերը, ընդհակառակը, քննադատել էին Ադրբեջանի հետ Իսրայելի ռազմավարական գործընկերությունը: Իրենց հոդվածում նրանք Իսրայելին կոչ էին արել վերանայել աջակցությունն Ադրբեջանին, հատկապես հաշվի առնելով Հայաստանի դեմ Բաքվի ագրեսիվ քաղաքականությունը: Հայաստանի ինքնիշխանության ոտնահարումը, նրանց կարծիքով, կուժեղացնի Թուրքիայի ազդեցությունը տարածաշրջանում և կհանգեցնի ապակայունացման, ինչը չի բխում Իսրայելի երկարաժամկետ շահերից։
