Twitter-ի սեփականատեր Իլոն Մասկը կարծում է, որ իր մենամարտը Մետայի ղեկավար Մարկ Ցուկերբերգի հետ կարող է կայանալ Կոլիզեյում։ Այս մասին նա հայտնել է ուրբաթ օրը Twitter-ի իր էջում, փոխանցում է TACC-ը։
«Հնարավորություն կա, որ մենամարտը կկայանա Կոլիզեյում»,- գրել է գործարարը։ Նա նաև տեղադրել է մի տեսանյութի հղում, որը պարունակում է մի հատված Մոնթի Փայթոնի «Բրայանի կյանքը» կատակերգական ֆիլմից՝ «Ես պետք է աշխատեմ իմ տոկունության վրա» մակագրությամբ։
Հունիսի 22-ին Ցուկերբերգն ընդունել է առանց կանոնների մենամարտ անցկացնելու Մասկի մարտահրավերը: Նա Մետայի ղեկավարին մարտահրավեր է նետել այն բանից հետո, երբ համացանցում տեղեկություն է հայտնվել ընկերության՝ Twitter-ի մրցակից հավելված գործարկելու մտադրության մասին:
UFC-ի նախագահ (Ultimate Fighting Championship) Դանա Ուայթը կարծում է, որ մենամարտը կկայանա և կդառնա պատմության մեջ ամենադիտարժանը։
