Ադրբեջանի Միլի Մեջլիսի նախագահի առաջին տեղակալ Ալի Ահմեդովի գլխավորած խորհրդարանական պատվիրակությունը չի մասնակցի Ադրբեջանի հանրապետության Միլի Մեջլիսի և Ռուսաստանի Դաշնության Դաշնային ժողովի միջխորհրդարանական համագործակցության հանձնաժողովի 23-րդ նիստին, որը տեղի կունենա Ռուսաստանի Դաշնության մայրաքաղաք Մոսկվայում, հայտնել են ադրբեջանական ԶԼՄ-ները։
Չեղարկումն Ադրբեջանում պայմանավորել են Ռուսաստանի Եկատերինբուրգ քաղաքում «ադրբեջանցիների նկատմամբ երկրի իրավապահ մարմինների կողմից էթնիկ հողի վրա ցուցադրաբար, նպատակաուղղված և առանց դատապարտման իրականացվող սպանություններով և բռնի գործողություններով»։
Հունիսի 28-ին Ադրբեջանի ԱԳՆ-ն բողոք էր հայտնել Ռուսաստանին Եկատերինբուրգում տեղի ունեցած ռեյդերի պատճառով, ինչի արդյունքում 9 ադրբեջանցի էր ձերբակալվել: Գերատեսչությունը հայտնել էր երկու ադրբեջանցու զոհվելու և վիրավորների մասին։ Ռուսաստանի Քննչական կոմիտեից և ՆԳՆ-ից հայտնել էին, որ ձերբակալություններն իրականացվել են հին քրեական գործերի հետաքննության շրջանակներում: Ադրբեջանական ԶԼՄ-ները հայտնել էին նաև ՌԴ փոխվարչապետ Ալեքսեյ Օվերչուկի Բաքու այցի չեղարկման մասին:
Հունիսի 29-ին Բաքուն չեղարկել էր Ադրբեջանում ՌԴ-ի մասնակցությամբ նախատեսված միջոցառումները։
