ՀՀ կրթության, գիտության, մշակույթի և սպորտի նախարար Ժաննա Անդրեասյանն այցելել է Արմավիրի մարզի Փարաքար համայնքի Մերձավան գյուղի և Արարատի մարզի Մխչյան գյուղի դպրոցներ՝ տեղի ունեցած միջադեպերի կապակցությամբ դպրոցների աշխատակազմերի հետ հանդիպելու նպատակով, հայտնում է ԿԳՄՍՆ-ն:
Մայիսի 13-ին Մերձավանում աշակերտները, որոշ ծնողներ ու ուսուցիչներ դասադուլ էին հայտարարել պատմության ուսուցիչ Ռոզա Դավթյանի դեմ, որն, ըստ նրանց, «անպատշաճ վարքագիծ է դրսևորել, վիրավորել» աշակերտներին և ուսուցիչներին, ինչպես նաև «անընդունելի հայտարարություններ» արել արցախցիների մասին։ ԿԳՄՍՆ-ն հայտնել էր, որ դպրոցի տնօրենը, որն աջակցել էր պատմության ուսուցչի դեմ գործադուլին, կազատվի աշխատանքից։
Մայիսի 14-ին Oragir News-ը հայտնել էր, որ Մխչյանի դպրոցում բարձր դասարանների մի քանի տղաներ դպրոցի զուգարանում կապկպել էին 4-րդ դասարանի երկու աշակերտի և ստիպողաբար թմրանյութ տվել: Դրանից հետո երեխաների մոտ կախվածություն էր ի հայտ եկել, նրանք սկսել էին տնից գումար գողանալ՝ կրկին նույն աշակերտներից թմրանյութ գնելու նպատակով։ Մխչյանում դպրոցականների մասնակցությամբ տեղի ունեցած դեպքով 4 անձի նկատմամբ հարուցվել էր հանրային քրեական հետապնդում։
Նախարարությունից հայտնում են, որ Անդրեասյանի հետ քննարկվել են ուսումնական հաստատություններում առկա խնդիրները և դրանց լուծման ուղիները՝ հատուկ ուշադրություն դարձնելով առողջ, հարգալից և անվտանգ միջավայրի ապահովմանը։
«Մերձավան և Մխչյան համայնքների դպրոցները կգտնվեն հատուկ մշտադիտարկման ներքո՝ բոլոր խնդիրների մանրամասն ուսումնասիրության և անհրաժեշտ քայլերի իրականացման նպատակով»,- ասվում է հաղորդագրությունում։
