2024 թվականի Ռուսաստանի ջրացատկի առաջնության բրոնզե մեդալակիր, 22-ամյա Ալեքսանդրա Բիբիկինան բացատրել է Հայաստանի դրոշի ներքո հանդես գալու իր որոշումը։
Նա Հայաստանի հավաքականում մրցելույթներն սկսել է 2025 թվականի մարտին։
«Ես ուզում եմ ցատկել, ուզում եմ ելույթ ունենալ միջազգային ասպարեզում։ Սպորտային կյանքը կարճ է, այս տարի կդառնամ 23 տարեկան, մտածեցի և որոշեցի պայքարել Հայաստանի դրոշի ներքո»,- ՏԱՍՍ-ին տված հարցազրույցում նշել է Բիբիկինան։
Նրա խոսքով՝ ինքը նոր երկիր ներկայացնելու իրավունք է ստացել մարտի կեսերին և արդեն մեդալ է նվաճել Եվրասիական գավաթի խաղարկությունում։
«Ինչո՞ւ Հայաստան, երկուստեք ցանկություն կար, և մենք արագ պայմանավորվեցինք ամեն ինչի շուրջ»,- բացատրել է մարզիկը:
Բիբիկինան նշել է, որ Ռուսաստանի ջրացատկի ֆեդերացիան հանգիստ է ընդունել իր որոշումը։
«Հաջորդ քառամյա ցիկլի իմ գլխավոր նպատակն է փորձել Հայաստանի համար օլիմպիական արտոնագիր նվաճել և 2028 թվականին Լոս Անջելեսում կայանալիք խաղերին մասնակցել»,- ընդգծել է նա։
Բիբիկինան խոստումնալից ռուս ջրացատկորդներից է, որը հանդես է գալիս անհատական և սինխրոն կարգերում:
