Սլովենիայի Մարիբոր քաղաքում ընթացող Եվրոպայի պատանեկան օլիմպիական փառատոնում Հայաստանի սպորտային մարմնամարզության երիտասարդական հավաքականը թիմային պայքարում զբաղեցրել է 3-րդ տեղը՝ վաստակելով 156,500 միավոր, հայտնում են ԿԳՄՍ նախարարությունից։
Հայաստանի հավաքականի կազմում ընդգրկված են Համլետ Մանուկյանը, Մամիկոն Խաչատրյանը և Ռոբերտ Գյուլումյանը: Նշվում է, որ առանձին վարժություններում հայ մարմնամարզիկները եզրափակչի ուղեգիր են նվաճել: Մասնավորապես՝ Համլետ Մանուկյանը եզրափակիչ է դուրս եկել նժույգթափերի և օղակների վարժություններում: Նժույգթափերի վարժությունում եզրափակչի ուղեգիր է նվաճել նաև Մամիկոն Խաչատրյանը, իսկ Ռոբերտ Գյուլումյանը եզրափակիչ է դուրս եկել ազատ վարժությունում:
Եվրոպայի պատանեկան օլիմպիական փառատոնին մասնակցում են նաև հեծանվորդներ Անի Գյոզալյանը, Ալեն Միրզոյանը, Հարություն Իսրայելյանը, լողորդներ Անահիտ Մուրադյանը և Սամվել Կարապետյանը, աթլետներ Սոֆիա Ջավախյանը, Վահե Արզումանյանը, ձյուդոիստներ Մհեր Օհանյանը, Ռազմիկ Գալստյանը, Արսեն Բադալյանը, Անդրեյ Անդրեյանը, Հայկ Դարբինյանը, Սեյրան Սարուխանյանը, Սյուզաննա Մանուկյանը, թենիսիստներ Սոֆի Գիդաչյանը, Լիլիթ Անտոնյանը, Դավիթ Պողոսյանը և Միքայել Ավանեսյանը, ինչպես նաև մարմնամարզիկ Մարիետա Բուչախչյանը:
Եվրոպայի պատանեկան օլիմպիական փառատոնը կտևի մինչև հուլիսի 29-ը:
