Եվրոպական խաղերի բռնցքամարտի մրցաշարում Հայաստանը ներկայացնող Համբարձում Հակոբյանը գերկամային հաղթանակ է տոնել Եվրոպական խաղերի 1/8 եզրափակչում, հայտնում են Հայաստանի բռնցքամարտի ֆեդերացիայից։
80 կգ քաշային հայ մարզիկը մրցել է Սերբիան ներկայացնող ազգությամբ ռուս Վլադիմիր Միրոնչիկովի հետ և հաղթանակը կորզել բառացիորեն վերջին վայրկյանին։
Առաջին ռաունդում մրցավարները 4։1 հաշվով առավելությունը տվել են մեր մրցակցին։ 2-րդ ռաունդում Հակոբյանը նետվել է առաջ ու ռաունդը շահել 3։2 հաշվով, բայց ռինգի մրցավարը բաց հարվածի համար զգուշացրել է հայ բռնցքամարտիկին ու միավոր հանել։
3-րդ ռաունդը գերլարված է եղել։ Հայ բռնցքամարտիկը ներդրել է ամբողջ ուժերն ու վերջին վայրկյանին նոկդաունի ենթարկել մրցակցին։ Արդյունքում՝ 3։2 հաշվով հաղթանակ է տարել։ 1/4 եզրափակչում հայ մարզիկի մրցակիցն ադրբեջանցի Մուրադ Ալահվերդիևն է։
