Երևանի Էրեբունի վարչական շրջանի Վարդաշենի թաղամասի վթարային շենքերից մեկի՝ հանրակացարանի բնակիչները պահանջում են բարելավել շենքի 17 բնակարանների պայմանները: Նրանք այսօր այս պահանջով բողոքի ակցիա են իրականացնում Երևանի քաղաքապետարանի շենքի մոտ:
«30 տարուց ավելի մենք ապրում ենք այնտեղ: Մարդ ենք, ինչքա՞ն կարանք օձերի մեջ ապրենք, արդեն տարբերում ենք իժը, գյուրզան, նստում ենք տանը, «կռիսները» գալիս են, իրենց գործողությունն անում են», – ասել է բնակիչներից մեկը:
Մյուսի խոսքով՝ իրենց հիշում են միայն ընտրությունների ժամանակ, սակայն իրենց խնդիրներով իրականում հետաքրքրվող և դրանք կարգավորող չկա: Շենքը 4-րդ կարգի վթարայնության է:
«Ընդամենը 17 սենյակ է, ոչ ոք չի եկել, չի հետաքրքրվել մեր շենքի վիճակով», – հավելել է վարդաշենցիներից մեկը:
Բացի այդ, բնակիչներն ասել են, որ քաղաքապետ Տիգրան Ավինյանը խոստացել է երկու հանրակացարանների շենքերում բարելավում է լինելու, սակայն ապարդյուն: Նրանք այսօր պահանջում էին, որ քաղաքապետարանի որևէ պաշտոնյա իջնի և լսի իրենց:
Քաղաքապետ Ավինյանը արձակուրդում է:
«Մենք էլ պիտի Վարդաշենի մյուս վթարային շենքերի բնակիչների նման փողոց փակենք, բողոքի ակցիա անենք։ Եթե Ավինյանը արձակուրդում է, թող նրա տեղակալներն իջնեն», – նշել է մեկ այլ բնակիչ։
Նրանք հավելել են, որ պատրաստ են լսել իրավական հստակ պատասխան, նույնիսկ եթե նշվի, որ այս խնդիրը ենթակա չէ լուծման: Ակցիան այս պահին դեռ շարունակվում է: Այսօր դեռևս որևէ պաշտոնական պարզաբանում նրանց խնդրին չի տրվել:
Վարդաշենի հանրակացարանի՝ 68ա և 66/1 շենքերի բնակիչները նաև մարտին էին բողոքի ակցիա կազմակերպել քաղաքապետարանի և կառավարության շենքերի առջև։ Նրանք պահանջել էին շենքերի վթարայնության պատճառով անհապաղ տարհանել իրենց և ապահովել բնակարաններով։ «Ազգային առաջընթաց» խմբակցության ղեկավար Հայկ Գրիգորյանն Armenia Today-ին տեղեկացրել էր, որ կառավարությունից ընդունել են նրանց, սակայն հարցին որևէ լուծում չեն առաջարկել։ Հանդիպման այլ մանրամասներ Գրիգորյանը չէր հայտնել։
