Վարչապետ Նիկոլ Փաշինյանը հնարավոր է համարել «Հայաստանի էլեկտրական ցանցեր» (ՀԷՑ) ընկերության կառավարման փոխանցումը այն երկրների օտարերկրյա ընկերություններին, որոնց հետ Հայաստանը հաստատել է դիվանագիտական հարաբերություններ: Վարչապետի մամուլի ասուլիսի ելույթը հեռարձակվում է Armenia Today YouTube ալիքով։
«Ես անհնար եմ համարում, որ այս համագործակցության մեջ տեղի ունենա մի բան, երբ մենք գնանք լուծումների, երբ ներգրավված են այնպիսի երկրներ, որոնց հետ Հայաստանի Հանրապետությունը դիվանագիտական հարաբերություններ չունի և որոնց հետ փակ սահմաններ ունի»,- նշել է Փաշինյանը։
Միևնույն ժամանակ, նա չի մանրամասնել, թե արդյոք կառավարությունը հնարավոր է համարում ՀԷՑ-ի կառավարումը փոխանցել թուրքական ընկերություններին, այն բանից հետո, երբ Հայաստանն ու Թուրքիան հաստատեն դիվանագիտական հարաբերություններ և բացեն իրենց սահմանները։
Փաշինյանը նաև ասել է, որ հայկական կողմն արդեն ուղերձ է հղել մի շարք բարեկամ երկրներում գործող միջազգային ընկերություններին՝ հայտնելով նրանց հետ համագործակցելու հետաքրքրություն՝ առանց մանրամասնելու, թե արդյոք թուրքական ընկերությունները ներառվա՞ծ են այս ցանկում։
Փաշինյանը խուսափել է պատասխանել այն հարցին, թե արդյոք ինքը փաստեր ունի՞ ՀԷՑ-ի կողմից միտումնավոր էլեկտրաէներգիայի անջատումների վերաբերյալ իր պնդումները հիմնավորելու համար։
Armenia Today-ի թղթակիցը խնդրել է վարչապետին պարզաբանել իր հայտարարությունները և հայտնել, թե արդյոք կան փաստեր, որոնք հաստատում են հունիսի 18-ի իր խոսքերը, որոնցում Փաշինյանը պնդում էր, որ մարզեր կատարած իր այցելությունների ժամանակ նա գրանցել է դեպքեր, երբ «ՀԷՑ»-ի գործունեությունը, իբր, երկրում հանգեցրել է «գրեթե էներգետիկ ճգնաժամի»։
Այնուհետև վարչապետը հավելել էր, որ իր վերլուծությունը «հիմք է տալիս ենթադրելու, որ այս ամենը արվել և արվում է Հայաստանում հասարակական դժգոհություն առաջացնելու նպատակով»։
Փաշինյանը պատասխանել է, որ անհրաժեշտ է «գտնել այս հարցերի պատասխանները»։
«Ես կարծում եմ, որ դա հետաքննության նյութ է։ Պետությունը դեռևս չի ստանձնել ՀԷՑ-ի կառավարումը, բայց հուսով եմ, որ առաջիկայում դա տեղի կունենա։ Եվ երբ ժամանակավոր կառավարիչը նշանակված կլինի, ես պետք է, բնականաբար, խնդրեմ, որ այս հարցերին օբյեկտիվ պատասխան գտնելու ուղղությամբ ջանքեր գործադրի»,- նշեց Փաշինյանը։
Հարցին, թե ինչպես են իշխանությունները պլանավորում բարելավել ոլորտի կառավարման արդյունավետությունը, նույնիսկ եթե նրանք երկար ժամանակ չեն նշանակել այս ոլորտի փոխնախարար, նա պարզաբանեց, որ պետությունը պետք է ստանձնի ՀԷՑ-ի կառավարումը և ուսումնասիրի էներգետիկայի ոլորտում առկա խնդիրները։ Վարչապետի խոսքով՝ պետականացման ավարտից հետո պարտադիր չէ, որ պետությունը շարունակի կառավարել կազմակերպությունը։
«Մեր խնդիրն է գտնել հնարավորինս արդյունավետ կառավարչին»,- նշել է Փաշինյանը։
Նա խուսափել է պատասխանել այն հարցին, թե ինչպես կազդի ՀԷՑ-ի պետական վերահսկողության տակ անցումը երկրի ներդրումային միջավայրի վրա։ Փաշինյանը խոստովանել է, որ ՀԷՑ-ի դեմ գործընթացը սկսելուց առաջ չի խորհրդակցել Արժույթի միջազգային հիմնադրամի, Համաշխարհային բանկի և այլ միջազգային ֆինանսական կազմակերպությունների հետ, որոնք Հայաստանի դոնորներն են։
«Իհարկե մենք մեր դիրքորոշումները պատշաճ ձևերով՝ անկեղծ, բաց, թափանցիկ ևամբողջական կներկայացնենք մեր միջազգային գործընկերներին, ովքեր դրանով հետաքրքրված են», – ասել է վարչապետը։
Կառավարության ղեկավարը հունիսի 18-ին ԱԺ-ում՝ ճեպազրույցի ժամանակ, հայտարարել էր, որ մեկ ամիս առաջ գործադիրի համապատասխան անդամներին ՀԷՑ-ի հետ կապված հանձնարարական էր տվել նախապատրաստելու կա՛մ վնասի փոխհատուցման ծրագիր քաղաքացիներին, կա՛մ «ընկերությունն ազգայնացնելու», քանի որ մարզերում ՀԷՑ-ի հետ կապված խնդիրներ էր արձանագրել։ Փաշինյանը նաև ՀԷՑ-ի անջատումների մեջ երկրի ներսում հասարակական դժգոհություն հրահրելու նպատակ էր տեսել։
Նա հայտարարել էր, որ «Քաղաքացիական պայմանագիր» խմբակցությունը «ՀԷՑ-ն ազգայնացնելու նախագիծ է ներկայացրել ԱԺ»։
«Տաշիր» ընկերությունների խումբը ՀԷՑ-ի կառավարման պարտականությունն ամբողջությամբ իր վրա էր վերցրել 2015-ին, երբ ընկերությունն «Ինտեր ՌԱՕ»-ի հետ պայմանագիր էր ստորագրել ՀՀ էլեկտրաէներգետիկ ակտիվների առուվաճառքի վերաբերյալ։
