Հուլիսի 13-ին ԱՄՆ Գլենդել քաղաքի հայերը ցույց են անցկացրել Հայաստանի հյուպատոսության մոտ՝ ի պաշտպանություն Հայ Առաքելական եկեղեցու և ընդդեմ ընդդիմության դեմ լայնածավալ բռնաճնշումների, հայտնում է Հայ եկեղեցու պաշտպանության համահայկական խորհուրդը։
Լոս Անջելեսի հայկական սփյուռքի ներկայացուցիչները ելույթներով պահանջել են անհապաղ դադարեցնել Հայաստանի իշխանությունների կողմից Հայ առաքելական սուրբ եկեղեցու հոգևորականների, ազգային բարերարների և ազգային դիմագիծ ունեցող գործիչների նկատմամբ իրականացվող ճնշումները, ինչպես նաև ազատ արձակել ներկայում կալանքի տակ գտնվողներին:
Ելույթներում շեշտվել է, որ եկեղեցու ինքնիշխանության ու կրոնական ազատության պաշտպանությունը համահայկական առաջնահերթ խնդիր է, իսկ պետության ցանկացած ոտնձգություն հայ սփյուռքը դիտում է որպես հարված ողջ ազգային ինքնությանը։
Խորհուրդն «Ազգային ճակատ» շարժման կողմից կազմակերպված հանրահավաքն անվանել է Լոս Անջելեսի հայերի կամքի արտահայտություն՝ «անսասան և անդադար, որը չի դադարի մինչև հավատքն ու արդարությունը չվերադառնան հայրենիք»։
Մայիսի 29-ից սկսած ՀՀ վարչապետ Նիկոլ Փաշինյանը սոցիալական ցանցերում հայհոյանքներով լի մի շարք գրառումներ էր արել Հայ Առաքելական եկեղեցու ներկայացուցիչների հասցեին, իսկ ավելի ուշ հանդես եկել նոր կաթողիկոս ընտրելու կոչով՝ կասկածի տակ դնելով նրա՝ կուսակրոնության ուխտի պահպանումը։ Փաշինյանը հուլիսի 8-ին հայտարարել էր, որ Մայր Աթոռ Սուրբ Էջմիածինը «զավթված է հակաքրիստոս, շնաբարո, ապազգային, ապապետական խմբակի կողմից», հավելելով, որ պատրաստվում է Վեհարանի «ազատագրումն առաջնորդել անձամբ»։
Իրավապահ մարմինները հունիսի 25-ի և 27-ի խուզարկություններից հետո երկու ամսով կալանավորել էին Բագրատ արքեպիսկոպոս Գալստանյանին, Շիրակի թեմի առաջնորդ Միքայել արքեպիսկոպոս Աջապահյանին, ինչպես նաև շարժման 14 աջակցի։ Գալստանյանը և «Սրբազան պայքարի» աջակիցները մեղադրվում են պետական հեղաշրջման և ահաբեկչության նախապատրաստության փորձ կազմակերպելու մեջ։ Նրանցից ոչ ոք չի ընդունում մեղադրանքը:
Դիտեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
