ՀՀ մարդու իրավունքների պաշտպան Անահիտ Մանասյանը խստորեն դատապարտել է հուլիսի 8-ին խորհրդարանի նիստերի դահլիճում պատգամավորների մասնակցությամբ տեղի ունեցած միջադեպը։ Նա կարծում է, որ խորհրդարանը պետք է լինի ժողովրդավարական քննարկումների հարթակ, այլ ոչ թե «մարտադաշտ»։
Մանասյանը շեշտել է խորհրդարանական էթիկայի հարցերի քննարկման մեխանիզմներ ձևավորելու անհրաժեշտությունը։
Այսօր ավելի վաղ ընդդիմադիր խմբակցության պատգամավոր Արթուր Սարգսյանի ելույթից հետո խորհրդարանում վեճ և կռիվ էր տեղի ունեցել։ «Քաղաքացիական պայմանագրի» ներկայացուցիչ Վահե Ղալումյանը փորձել էր հարձակվել Սարգսյանի վրա, երբ նա պատրաստվում էր լքել նիստերի դահլիճը։
Հայաստանի խորհրդարանը հուլիսի 8-ի նիստում քննարկում է Սարգսյանին՝ անձեռնմխելիությունից զրկելու հարցը։ Նա մեղադրվում է «ահաբեկչության նախապատրաստման և իշխանության զավթման» մեջ, որին ներգրավված են արքեպիսկոպոս Բագրատ Գալստանյանը և ևս 15 անձ։
«Հայաստան» ընդդիմադիր խմբակցության պատգամավոր Քրիստինե Վարդանյանը, որը տեսանյութ էր հրապարակել Ազգային ժողովի նիստերի դահլիճից, հայտարարել է, որ «ենթադրաբար իշխող կուսակցության պատգամավորների օգնականները ներխուժել են նիստերի դահլիճ և հարձակվել ընդդիմադիր պատգամավորների վրա»։ «Սա երկրի «Ժողովրդավարության բաստիոնի» պատկերն է, նայեք»,- նշել է Վարդանյանը։
