Երևանի քաղաքապետ Տիգրան Ավինյանը հանձնարարել է շրջանառությունից դուրս բերել հասարակական տրանսպորտում օգտագործվող QR-կոդով թղթե միանվագ տոմսերը։ Այս մասին Ավինյանը հայտարարել է Երևանի ավագանու հունիսի 16-ի նիստին, որն ուղիղ հեռարձակել է Armenia Today-ը։
«Թղթային տարբերակով QR- կոդերի վերացումը պետք է ապահովենք այս ամառվա ընթացքում: Ամենայն հավանականությամբ, օգոստոսի 1-ից սկսած՝ թղթային տարբերակով այլևս չպետք է գործեն QR-ները: Մեր խնդիրներից մեկը նաև դա է»,- նշել է քաղաքապետը։
Նա ընդգծել է, որ այս տոմսերը կապված են ուղեվարձի հավաքագրման խնդիրների հետ։
Երևանում փետրվարից 1-ից թանկացել է հանրային տրանսպորտի ուղեվարձը, ուժի մեջ է մտել նոր միասնական տոմսային համակարգը։ Նախկին 100 դրամի փոխարեն ուղևորն այժմ մեկանգամյա երթևեկության համար վճարում է 150 դրամ: Կան նաև տարբեր փաթեթներ և զեղչեր ուսանողների, դպրոցականների, նպաստառուների և թոշակառուների համար:
Գործում են հետևյալ սակագները.
-
150 դրամ՝ մեկ ուղևորություն
-
300 դրամ՝ 180 րոպեանոց փաթեթ
-
2000 դրամ՝ 10 ուղևորության փաթեթ՝ 45 օրվա օգտագործման ժամկետով (նախկինում՝ 2200 դրամ՝ 30 օրվա համար)։
Նախորդ տարվա դեկտեմբերին քաղաքապետարանն առաջարկել էր էլեկտրոնային վճարման դեպքում մինչև փետրվարի 1-ը պահպանել 100 դրամանոց սակագինը: Հունվարի վերջին վարչապետ Նիկոլ Փաշինյանը գովաբանել էր հասարակական տրանսպորտում QR-կոդով նոր վճարային համակարգը՝ նշելով, որ անկանխիկ փոխանցման համակարգը «շատ տպավորիչ է, լավ ու հարմար»։
