Մայիսի 23-ին քաղաքացիները փակել էին Էրեբունի վարչական շրջանի Արին բերդ փողոցը՝ պահանջելով բարեկարգել այն։ Տարածքում բնակվողների խոսքով՝ քաղաքապետարանից չեն արձագանքել ամիսներ առաջ իրենց կողմից բարձրաձայնած խնդիրներին և որևէ քայլ չեն իրականացրել։
Քաղաքացիներից մեկը նշել է, որ ճանապարհն անմխիթար է, ինչի պատճառով խնդիրներ են առաջանում, մեքենաներ են վնասվում, քանի որ փոսալցումներ գրեթե չեն կատարվել։
Նրանք հայտարարել են, որ փողոցը փակելու միջոցով նաև պահանջում են քաղաքապետարանից պաշտոնյա գա ու իրենց ասի, թե ե՞րբ են սկսելու բարեկարգման աշխատանքներ իրականացնել։
«Փոսերի ու փոշու մեջ մի օր մեկը մեքենան է ջարդում, մյուսը՝ ոտքը, մեկն էլ մեքենայի տակ է ընկնում»,- հայտարարել են ակցիայի մասնակիցները՝ հավելելով, որ տաքսիները մարդկանց հեռու են իջեցնում, քանի որ գիտեն, թե ինչ վատ վիճակ է փողոցում։
Ակցիայից որոշ ժամանակ անց քաղաքացիների հետ հանդիպման է եկել Էրեբունի վարչական շրջանի ղեկավար Հակոբ Բալայանը։ Վերջինս քաղաքացիներին հավաստիացրել է, որ երբ մրցույթն անցկացվի, հաղթող ընկերությունն սկսելու է փողոցը հիմնովին բարեկարգելու աշխատանքները։ Մինչ այդ, նրա խոսքով, առաջիկա շաբաթվա ընթացքում որոշակի բարեկարգման աշխատանքներ կիրականացվեն։
«Ես ձեզ կապիտալ վերանորոգված ճանապարհ եմ խոստանում»,- ակցիայի մասնակիցներին ասել է Բալայանը։
Թաղապետի հետ զրույցից հետո քաղաքացիները որոշել են բացել ճանապարհը։
Ավելի ուշ Երևանի քաղաքապետարանի խոսնակ Հայկ Կոստանյանը հայտնել է, որ Արին Բերդի փողոցի և Արցախի պողոտայի խաչմերուկը Արին Բերդի 5-րդ նրբանցքի խաչմերուկին միացնող ճանապարհահատվածի հիմնանորոգման նախագծանախահաշվային փաստաթղթերը Երևանի քաղաքապետարանի կողմից 2025 թվականի ապրիլի 30-ին դրվել են մրցույթի, որին մասնակցելու հայտ չի ներկայացվել։
«Նոր մրցույթի հաղթող ճանաչվելուց հետո կհայտարարվի շինարարության մրցույթ, որից հետո էլ հիմնանորոգման աշխատանքները կմեկնարկեն»,- եզրափակել է խոսնակը։
