Վարչապետ Նիկոլ Փաշինյանը մարտի 26-ին Ազգային ժողովում հայտարարել է, որ Հայաստանի պաշտոնական որոշմամբ՝ չպետք է շարունակել Ղարաբաղյան շարժումը։
Փաշինյանը նշել է՝ Երևանն այդպիսով ուզում է համոզված լինել, որ Ադրբեջանում ևս չկա քաղաքական որոշում, օրինակ՝ «Արևմտյան Ադրբեջանի» շարժում սկսելու վերաբերյալ։ Փաշինյանը նաև ասել է, որ հայ ժողովուրդը կիսում է Ղարաբաղյան շարժումը չշարունակելու իր կարծիքը։
Armenia Today-ը քաղաքացիներից հետաքրքրվել է՝ համաձա՞յն են Փաշինյանի հայտարարության հետ, թե՞ ոչ։ Քաղաքացիներին նաև հարցրել ենք, թե իրենց կարծիքով ո՞րն է հայտարարության նպատակը և ի՞նչ ազդեցություն կարող է ունենալ Արցախին առնչվող հնարավոր գործընթացների վրա։
«Ո՞նց չպետք է շարունակվի։ Ես հասկանում եմ, որ մենք ամեն ինչ կորցրել ենք, գուցե շարունակելը իմաստ չունի, բայց շատ դաժան վիճակ է։ Միգուցե շարունակենք ու ինչ-որ մի բանի հասնե՞նք»,- ասաց մի կին։
Մեկ այլ տղամարդ նշեց, որ համաձայն է չշարունակելու հետ, որպեսզի այլևս զոհեր չլինեն։
Քաղաքացիներից ոմանք դժվարացան պատասխանել, թե ինչո՞ւ է վարչապետը նման հայտարարություն արել։
«Իրեն պետք է հարցնել։ Ինքն այդ հարցերին կարող է պատասխանել։ Երևի ադրբեջացիներն են ստիպել»,- պատասխանեց մի տղամարդ։
Մանրամասները՝ տեսանյութում։
