Զանգեզուրի պղնձամոլիբդենային կոմբինատի (ԶՄՊԿ) աշխատակիցների բողոքի ակցիայի պատճառ է հանդիսացել ԶՄՊԿ-ի աշխատավարձերի համահարթեցման գործընթացը։ Այս մասին Armenia Today-ին ասել է կոմբինատի մամուլի խոսնակ Արայիկ Մարգարյանը։
Ըստ ԶԼՄ-ների՝ բողոքի ակցիան մեկնարկել էր հունվարի 31-ին։ Աշխատակիցները պահանջել են աշխատավարձերի 50 տոկոսով բարձրացում և վերադասի հետ բաց երկխոսության ապահովում:
Խոսնակը տեղեկացրել է, որ հունվարից ուժի մեջ է մտել ընկերության կողմից աշխատավարձերի հավասարեցման համապատասխան որոշումը, ինչն առաջացրել է դժգոհություն։
«Նույն աշխատանքը կատարող մի շարք աշխատակիցներ 75-ամյա կոմբինատում տարիներ շարունակ ստացել են տարբեր չափի աշխատավարձ։ Ընկերության տնօրինությունը որոշել է հավասարեցնել աշխատավարձերը, ինչի արդյունքում բոլորի մոտ աշխատավարձի բարձրացում է տեղի ունեցել։ Սակայն, բնականաբար, առավել ցածր վարձատրվողի աշխատավարձը բարձրացել է ավելի շատ, քան բարձր ստացողինը»,- պարզաբանել է նա։
Ըստ Մարգարյանի՝ դժգոհություն է արտահայտել 150 աշխատակից՝ պահանջով, որ բոլորի աշխատավարձն անխտիր բարձրանա 50%-ով, իսկ նման որոշում ընկերությունը չի կայացրել և համարում է «անիրատեսական»։ Այդուհանդերձ, ցուցարարները երեկ հանդիպել են ընկերության գլխավոր տնօրեն Ռոման Խուդոլիի հետ և հայտնել իրենց պահանջը։ Մինչ այդ նրանք հանդիպումներ են ունեցել իրենց բաժինների ղեկավարների հետ և խոսել խնդրի մասին։
Մարգարյանը նշել է, որ 4700 աշխատակից ունեցող կոմբինատում բողոքի ակցիայի մասնակիցների պատճառով խախտվում են մյուս աշխատողների իրավունքները։ Ըստ նրա՝ ընկերությունը սա չի որակում որպես գործադուլ, քանի որ դրա համար բոլորովին այլ իրավական ընթացակարգեր կան, որոնք ցուցարարները չեն ապահովել։
Նա հավելել է, որ ընկերությունը կարող է հարկադիր պարապուրդի ուղարկել անհամաձայնություն հայտնած աշխատակիցներին, քանի որ ԶՊՄԿ-ն նման պահվածքն օրենքի խախտում է համարում։
Զանգեզուրի պղնձամոլիբդենային կոմբինատն այսօր ավելի հանդես է եկել հայտարարությամբ՝ ընդգծելով, որ մի շարք աշխատակիցներ չեն ներկայացել աշխատանքի, չեն կատարել իրենց աշխատանքային պարտականությունները կամ լքել են իրենց աշխատատեղերը` վերջնագրային կերպով պահանջելով աշխատավարձի անիրատեսական բարձրացում:
Ընկերությունն աշխատակիցների պահանջն «անիրատեսական» է համարել և հավելել, որ այս պահվածքը սաբոտաժի է ենթարկել ընկերությունում աշխատանքային գործընթացը: ԶՊՄԿ-ն նշել է, որ «աշխատակիցների անօրինական գործողությունների պատճառով ընկերության արտադրական ցիկլը խաթարվել է, և մյուս աշխատակիցները կրում են զգալի նյութական վնաս»։
Ըստ հաղորդագրության՝ եթե «անօրինական գործողությունները շարունակվեն», ընկերությունը համապատասխան միջոցներ կձեռնարկի՝ աշխատակիցներին հարկադիր պարապուրդի ուղարկելու տեսքով կամ կիրացնի աշխատանքային պարտավորությունները խախտողներին կարգապահական պատասխանատվության ենթարկելու իր իրավունքները՝ համաձայն ՀՀ աշխատանքային օրենսգրքի 21-րդ գլխի:
ԶՊՄԿ-ն 2024 թվականի արդյունքներով գլխավորել էր Հայաստանի 1000 խոշոր հարկատուների ցանկը։ 2024 թվականի դեկտեմբերին վարչապետ Նիկոլ Փաշինյանը հայտարարել էր, որ ԶՊՄԿ-ն ՀՀ պետական բյուջե էր փոխանցել 33,25 մլրդ դրամ՝ որպես կառավարության շահաբաժին։
