Նոյեմբերի 13-ին՝ ժամը 19:40-ի սահմաններում ավտովթար է տեղի ունեցել Արարատի մարզում, որի հետևանքով մահացել է Ազատի զինվորական կացարանում զոհված զինծառայողի հայրը, գրում է Shamshyan.com-ը։
Նշվում է, որ Opel Astra մակնիշի ավտոմեքենան Մասիս-Վաղարշապատ ավտոճանապարհի Սայաթ-Նովա-Միզամի գյուղերի խաչմերուկում դուրս է եկել հանդիպակաց երթևեկելի գոտի, բախվել հողաթմբերին, ապա բետոնե սյանը և մասամբ հայտնվել չգործող առվակում: Վթարի հետևանքով վարորդը տեղում մահացել է, իսկ 1 հոգի տեղափոխվել է «Էրեբունի» բժշկական կենտրոն:
Լրատվամիջոցի փոխանցմամբ՝ դեպքի վայրում հավաքված քաղաքացիներն ասել են, որ մահացածն Ազատ գյուղում՝ ՀՀ ՊՆ զորանոցում տեղի ունեցած առեղծվածային հրդեհի հետևանքով մահացած զինվորներից մեկի հայրն էր և, հնարավոր է, ավտոմեքենան վարելիս սրտի հետ կապված խնդիրներ են առաջացել:
Հունվարի 19-ին Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում հրդեհ էր բռնկվել, որի հետևանքով զոհվել էր 15 զինծառայող։
