ԱԺ-ն այսօր քննարկել է «Եվրասիական տնտեսական միությունում փոխադրումների հետագծման համար նավիգացիոն կապարակնիքների կիրառման մասին» համաձայնագիրը վավերացնելու մասին նախագիծը:
Նախագծի շրջանակներում ՔՊ-ական պատգամավորև Խաչատուր Սուքիասյանը հարց ուղղեց. «Ուզում էի հասկանալ՝ ի՞նչ կարող են գործադիրն ու օրենսդիրը միասին անել, որ մեկ օր շուտ ճանաչեն մեր կապարակնիքները: Համապատասխան տեխնիկական վերազինումն ի՞նչ արագությամբ կարող է լինել, որ կարողանան տեսնել, թե ինչ կա բեռնատարի մեջ՝ հաշվի առնելով այն հանգամանքը, որ մեր տնտեսվարող սուբյեկտները բավականին մեծ վնասներ են կրում հերթերի մեջ»:
Նա հիշեցրեց, որ պետք է առաջնահերթ դիտարկել հումանիտար ապրանքները, որոնց թվում նաև սնունդն է: «Առաջարկ կլինի՞, որ այդ երկրների հետ համաձայնության գանք այն հարցում, որ առաջնահերթ պետք է անցնի հենց սնունդը, որովհետև կան սովի մատնված մարդիկ, և սնունդը պետք է հումանիտար ապրանք դիտվի»,-հարցրեց նա:
ՊԵԿ փոխնախարար Աշոտ Մինասյանն ի պատասխան նշեց, որ համաձայնագիրը միջազգային է և կարիք կա, որ բոլոր հինգ երկրներն այն վավերացանեն. «Այդուհանդերձ, մենք դրան չենք սպասելու: ՌԴ-ի հետ հարաբերությունների, Վրաստանի հետ համաձայնություն ձեռք բերելու շրջանակում կփորձենք այս համակարգն օր առաջ կիրառել, որպեսզի ձեր ասած խնդիրներին օր առաջ լուծում տանք»:
Նշենք, որ ԵՏՄ-ում փոխադրումների հետագծման համար նավիգացիոն կապարակնիքների կիրառման մասին» համաձայնագիրը ստորագրվել է 2022թ. ապրիլի 19-ին՝ Մոսկվայում: Համաձայնագրով նախատեսվում է նավիգացիոն կապարակնիքների կիրառմամբ Եվրասիական տնտեսական միությունում ապրանքների փոխադրման հետագծելիության միասնական համակարգի ներդրում: Համաձայնագրի ստորագրման նպատակն է անդամ պետությունների տարածքով փոխադրումներ իրականացնելիս ժամանակակից տեխնիկական և տեխնոլոգիական լուծումների կիրառության ընդլայնման միջոցով Միության ներքին շուկայում ապրանքների շրջանառության օրինականության ապահովումը, ինչը կնպաստի տնտեսական ինտեգրման հետագա զարգացմանը: Սահմանվում են Միության երկու եւ ավելի անդամ պետությունների տարածքներով փոխադրումների հետագծելիության ապահովման հիմքերը եւ կարգավորվում են նավիգացիոն կապարակնիքների կիրառման մեխանիզմները: Համաձայնագիրը ստորագրվել է ՀՀ, Բելառուսի Հանրապետության, Ղազախստանի Հանրապետության, Ղրղզական Հանրապետության և ՌԴ-ի միջեւ:
Մանրամասները՝ տեսանյութում:
