«S7 Airlines-ը չեղարկել է միջազգային թռիչքները մի շարք ուղղություններով՝ ստեղծված իրավիճակի պատճառով»։ Այս մասին հաղորդվում է ավիաընկերության կայքում։
Նշվում է, որ մինչև ապրիլի 30-ը ներառյալ չեղարկվել են չվերթները դեպի Եվրոպա (Ավստրիա, Բուլղարիա, Գերմանիա, Հունաստան, Իսպանիա, Իտալիա, Կիպրոս, Մոլդովա, Ֆրանսիա) և դեպի ԱՊՀ մի շարք երկրներ, այդ թվում՝ Հայաստան, Ադրբեջան, Ղրղզստան, Տաջիկստան, Մոլդովա։
Մասնավորապես, ավիաընկերությունը չեղարկել է դեպի Հայաստան հետևյալ չվերթները.
– Միներալնիե Վոդի-Երևան- Միներալնիե Վոդի, S7 6437 / S7 6438.
– Նովոսիբիրսկ – Երևան – Նովոսիբիրսկ, S7 5591 / S7 5592.
– Կրասնոդար – Երևան – Կրասնոդար, S7 6417 / S7 6418.
– Մոսկվա – Գյումրի – Մոսկվա, S7 3215 / S7 3216.
Ավելի վաղ՝ մարտի 3-ին, Քաղաքացիական ավիացիայի կոմիտեի տեղեկատվության համաձայն, ռուսական S7 Airlines ավիաընկերության կողմից շահագործվող A320 օդանավն ուղղություն էր վերցրել դեպի Երևանի «Զվարթնոց» օդանավակայան։ Ինքնաթիռի ժամանումից մի քանի ժամ առաջ, երբ այն դեռ ռուսական օդային տարածքում էր, պարզվել է, որ այս օդանավը խնդիրներ ունի թռիչքների անվտանգության հետ կապված փաստաթղթերի հետ։ Այս առնչությամբ ավիաընկերության որոշմամբ ինքնաթիռը վայրէջք է կատարել Միներալնիե Վոդիում, որից հետո ժամանել է Երևանի «Զվարթնոց» օդանավակայան և Երևանի օդանավակայանից օդ չի բարձրացել։
