«Թումո» ստեղծարար տեխնոլոգիաների կենտրոնը մասնաճյուղ է բացել Ճապոնիայի Գունմա պրեֆեկտուրայի Տակասակի քաղաքում, տեղեկանում ենք «Թումո»-ի X-ի էջում։ Սա «Թումոյի» առաջին միջազգային կենտրոնն է Ասիայում։
Ըստ հրապարակման՝ կենտրոնը կգործի Գունմա պրեֆեկտուրայի հետ համագործակցությամբ՝ տարածաշրջանի ամենամեծ համաժողովների կենտրոնում գտնվող G Messe Gunma-ում: Այն հազարավոր ճապոնացի դեռահասների հնարավորություն կտա սովորել նորարարական հմտություններ տեխնոլոգիաների և դիզայնի խաչմերուկում:
Ապագայում նախատեսվում է բացել լրացուցիչ «Թումո» կենտրոններ և շարժական «Թումո» արկղեր Մաեբաշիում և Կուսացուում, ինչն ընդլայնում է ծրագրի հասանելիությունը Ճապոնիայի ավելի շատ երիտասարդների համար։
Բացման արարողությանը ներկա էին «Թումո»-ի հիմնադիրներ Սեմ և Սիլվա Սիմոնյանները, նահանգապետ Իչիտա Յամամոտոն, թվային վերափոխման նախկին նախարար Տարո Կոնոն, ՀՀ խորհրդարանի փոխխոսնակ Հակոբ Արշակյանը, Ճապոնիայում ՀՀ դեսպան Մոնիկա Սիմոնյանը, Թումոյի գործադիր տնօրեն Մարի Լու Փափազյանը, զարգացման գծով գլխավոր տնօրեն Բեգոր Փափազյանը և այլք։
2022 թվականի հունիսին «Թումո»-ի գործադիր տնօրեն Մարի Լու Փափազյանն Armenia Today-ին պատմել էր առաջիկա տարիներին ստեղծարար տեխնոլոգիաների կենտրոնի ծրագրերի մասին և հայտարարել «Թումո տուփ» կենտրոնների ցանցն ընդլայնելու ծրագրի մասին։ Միևնույն ժամանակ՝ «Թումո» կենտրոններ էին բացվել Արցախի Ասկերան և Մարտունի քաղաքներում, իսկ 2022 թվականի դեկտեմբերին կենտրոնը հայտարարել էր Գերմանիայում՝ Մանհայմում, երկրորդ մասնաշենքի բացման մասին։
Կենտրոնի մասնաճյուղերը գործում են նաև Գյումրիում, Մոսկվայում, Փարիզում, Բեյրութում, Բեռլինում, Տիրանայում և Կիևում։ 2023 թվականի դեկտեմբերին «Թումո»-ն հայտարարել էր իր նախաձեռնության ընդլայնման մասին՝ ստեղծելու մշակութային վայրերի մանրամասն 3D սկանավորում՝ Հայաստանի և Արցախի ժառանգությունը թվայնորեն պահպանելու համար։
