Արցախի խորհրդարանի մի խումբ պատգամավորներ դատապարտել են ՀՀ Ազգային ժողովի նախագահ Ալեն Սիմոնյանի հայտարարությունները՝ Արցախի ժողովրդի նվաստացման փորձերի վերաբերյալ:
Հայտարարությունն ստորագրել է 24 պատգամավոր, այդ թվում՝ Արցախի ԱԺ նախագահի ժամանակավոր պաշտոնակատար Գագիկ Բաղունցը։
Պատգամավորները շեշտել են, որ ՀՀ ԱԺ նախագահի նման մոտեցումն ու մտածելակերպը բացահայտում են ՀՀ իշխանությունների միտումը հայ ժողովրդի զանազան հատվածների մեջ պառակտում սերմանելու հարցում:
«Արցախի համար ազգային-ազատագրական պայքարը, անկախ հանրապետության կայացումը, արյան ու քրտինքի գնով մինչև վերջին շունչը պայքարի արդյունք է: Այդ փաստի ուրացումն ազգադավ կեցվածք է և թշնամու քարոզչության արդյունք: Նման արտահայտությունները ոչ այլ ինչ են, քան սրբապղծություն հայրենիքի համար նահատակված հայորդիների հանդեպ»,- ասվում է հայտարարության մեջ:
Փետրվարի 11-ին ՀՀ ԱԺ նախագահը, պատասխանելով լրագրողի հարցին, թե ե՞րբ կարող է վերադառնալ Արցախ, հայտարարել էր, որ պետք էր մինչև վերջն մնալ ու կռվել Արցախի համար։ Փետրվարի 12-ին Արցախի նախկին նախագահ Սամվել Շահրամանյանը հայտարարել էր, որ արցախցիներն ամեն ինչ արել են իրենց հայրենիքում մնալու համար և Սիմոնյանին կոչ էր արել ներողություն խնդրել արցախցիներից։ Սիմոնյանի հայտարարությունը քննադատել էր նաև Արցախի ՄԻՊ Գեղամ Ստեփանյանը՝ այն անվանելով «տիեզերական մակարդակի ստորություն»։ Խոսնակի հայտարարությունները դատապարտել էր նաև Հայ առաքելական եկեղեցու Արցախի թեմը։
