Ադրբեջանը պաշտոնապես հայտնել է 192 զոհի ու 511 վիրավորի մասին: Տեղեկությունը հայտնել է երկրի Առողջապահության նախարարությունը:
Սեպտեմբերի 19-20-ը իրականացրած ռազմական ագրեսիայի արդյունքում զոհված մարդկանցից 180-ը ՊՆ զինծառայողներ են, 12-ը՝ ՆԳՆ, 1-ը՝ քաղաքացիական անձ։
11 անձի ինքնությունը դեռևս պարզված չէ, ընդհանուր առմամբ վիրավորվել է զինծառայողներից 511-ը և 1 քաղաքացիական անձ։
Ավելի վաղ հայտնել էինք, որ Ադրբեջանական մամուլը հայտնել է առնվազն 199 զոհի մասին և հրապարակել անունները: Տվյալները հավաքագրվել են ադրբեջանական սոցցանցերում տարածված գրառումներից և հարազատների ու համայնքերի գործադիր գրասենյակներից:
Սեպտեմբերի 19-ին Ադրբեջանը լայնամասշտաբ հարձակում է սկսել Արցախի Հանրապետության նկատմամբ։ Վերջին տվյալներով կա 200 զոհ և 400 վիրավոր։ Ադրբեջանի պաշտպանության նախարարությունը հայտարարել էր ԼՂ-ում զինված գործողություն սկսելու մասին։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»:
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին:
Ըստ համաձայնության՝ սեպտեմբերի 21-ին հանդիպում տեղի ունեցավ Եվլախում։ Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը հայտարարել էր, որ Եվլախում տեղի ունեցած բանակցությունները կարող են հանգեցնել Բաքվի և Երևանի միջև խաղաղության պայմանագրի կնքմանը։ Սեպտեմբերի 21-ին ավելի ուշ պաշտոնական Ստեփանակերտը հայտարարեց, որ գործնական մթնոլորտում անցած հանդիպման ընթացքում քննարկվել են երկուստեք կարևորություն ունեցող մի շարք հարցեր: Ըստ Ստեփանակերտի՝ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։
