Ադրբեջանի իշխանությունները հայտարարել են, որ «Զանգեզուրի միջանցքի» բացման հարցում Երևանից սպասում են «կոնկրետ քայլերի», տեղեկացնում են ադրբեջանական լրատվամիջոցները։
Այս հայտարարությունն արել է Ադրբեջանի նախագահի օգնական Հիքմեթ Հաջիևը Պրահայում Globsec ֆորումի շրջանակներում անցկացված «Միջին միջանցք. նոր աշխարհաքաղաքական և աշխարհատնտեսական կենսական գիծ» թեմայով քննարկման ժամանակ, որին մասնակցում է նաև Հայաստանի վարչապետ Նիկոլ Փաշինյանը։
Իրան-Իսրայել հակամարտության նոր փուլի ֆոնին Հաջիևն ասել է, որ այսպես կոչված՝ միջանցքը «նոր հնարավորություններ կբացի Հայաստանի համար և այն կդարձնի տարածաշրջանային տրանսպորտային համակարգի մաս»։
Իրանը հունիսի 13-ին բալիստիկ հրթիռների կիրառմամբ հարվածներ էր հասցրել Իսրայելին՝ ի պատասխան Թել Ավիվի՝ ավելի քան 200 կործանիչի կիրառմամբ հունիսի 13-ի գիշերվա հարձակման, որի հետևանքով իրանցի բարձրաստիճան զինվորականներ են զոհվել: ՀՀ ԱԳՆ-ն դատապարտել էր Իսրայելի հարձակումն Իրանի վրա։
Հունիսի 14-ին Միջուկային և ռադիացիոն անվտանգության գիտատեխնիկական կոնտրոնը հայտնել էր, որ Հայաստանի հարավում ռադիոակտիվ ֆոնի փոփոխություն չկա։ «Պատիվ ունեմ» խմբակցության պատգամավոր Տիգրան Աբրահամյանը հայտարարել էր, որ Իրանի «զբաղվածությունը» վտանգավոր վիճակ է ստեղծում «Զանգեզուրի միջանցք»-ի ուղղությամբ։
Կարդացեք նաև՝
Փորձագետները գնահատել են Հայաստանի հնարավոր քայլերը` Իսրայելի կողմից Իրանի վրա հարձակման ֆոնին
