Մենք անցնում ենք Հայաստանի հետ հարաբերությունների կարգավորման աստիճանական գործընթաց, թուրքական լրատվամիջոցների փոխանցմամբ՝ հայտարարել է Թուրքիայի նախագահ Ռեջեփ Թայիփ Էրդողանը։
Նրա խոսքով՝ երբ հարաբերությունները կարգավորվեն և երբ խաղաղություն հաստատվի, երկու երկրները կշահեն դրանից։
«Թուրքիան ակնկալում է, որ Իրանը կաջակցի «Զանգեզուրի միջանցքի» վերաբերյալ այն քայլերին, որոնք կնպաստեն տարածաշրջանում խաղաղությանը, կայունությանը և զարգացմանը»,- ասել է Թուրքիայի առաջնորդը։
Նա նաև հայտարարել է, որ Թուրքիան նպաստում է Բաքվի և Երևանի միջև խաղաղության կարգավորմանը։
«Ուրախ ենք, որ Ադրբեջանի և Հայաստանի միջև խաղաղությունը մոտ է։ Ուշադիր հետևում ենք այս գործընթացին։ Մենք նույնպես անհրաժեշտ ներդրում ենք կատարում և պատրաստ ենք դա անել ապագայում։ Խաղաղությունն արժեքավոր կլինի Ադրբեջանի, Հայաստանի և մեր երկրի համար»,- ասել է նա։
Մայիսի 16-ին Ալբանիայում Հայաստանի վարչապետ Նիկոլ Փաշինյանը կարճ զրույց էր ունեցել Էրդողանի հետ: Նույն օրը Փաշինյանը հանդիպել էր նաև Ադրբեջանի նախագահ Իլհամ Ալիևին:
