Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն հայտարարել է, որ «Զանգեզուրի միջանցքի» նախագիծը նախատեսվում է իրականացնել «առաջիկա 3-4 տարիների ընթացքում», հայտնում են ադրբեջանական լրատվամիջոցները։
Նա նշել է, որ նախագիծը «Թուրքիան կկապի թուրքական աշխարհի հետ»։ Ուրալօղլուն նաև հայտարարել է, որ ինչպես Ադրբեջանը, այնպես էլ Թուրքիան շարունակում են նախագծի իրականացման աշխատանքները:
2024 թվականի մայիսին Ուրալօղլուն հայտարարել էր, որ, այսպես կոչված, «Զանգեզուրի միջանցքը» հնարավոր կլինի լիարժեք շահագործել 2028-29թթ.։ Նա չէր բացառել, որ այդ միջանցքը կարող է անցնել Իրանի ու Հայաստանի տարածքով։ Փետրվարին Ուրալօղլուն հայտնել էր, որ Անկարան «Զանգեզուրի միջանցքի» երկու տարբերակ է քննարկում, և եթե Հայաստանի հետ խնդիրներ առաջանան, 43 կմ երկարությամբ երթուղին կարող է անցնել նաև Իրանով։
Հայաստանի իշխանությունները բազմիցս հայտարարել էին, որ Երևանի համար անընդունելի է տարածաշրջանում հաղորդակցությունների ապաշրջափակումը «միջանցքի տրամաբանությամբ»: Ապրիլին ՀՀ արտգործնախարար Արարատ Միրզոյանը հայտարարել էր, որ հայկական կողմի համար անընդունելի են Բաքվի դիրքորոշման մեջ պարունակվող արտատարածքային վերահսկողության և միջանցքի բաղադրիչները։ Միևնույն ժամանակ, Հայաստանն Ադրբեջանին առաջարկել էր ապաշրջափակել երկու երկրների երկաթուղային ենթակառուցվածքները, ինչպես նաև պարզեցնել երկու երկրների սահմանով բեռների անցման տարբերակը:
