Ադրբեջանը Ռուսաստանի դաշնակիցը չէ Անդրկովկասում, News.am-ին տված հարցազրույցում ասել է Պետդումայի ԱՊՀ հարցերով հանձնաժողովի առաջին փոխնախագահ Կոնստանտին Զատուլինը։
«Ադրբեջանը Թուրքիայի դաշնակիցն է ոչ միայն Անդրկովկասում, այլև ընդհանրապես։ Ռուսաստանը, իհարկե, կցանկանար նորմալ հարաբերություններ զարգացնել Ադրբեջանի հետ, բայց դա չի նշանակում նայել Բաքվի բերանին և գովաբանել այն բանի համար, ինչ նա իրականում չի հանդիսանում», – նշել է Զատուլինը։
Պատգամավորը շեշտել է, որ Ռուսաստանը հետաքրքրված է Հայաստանի և Ադրբեջանի միջև խաղաղ հարաբերություններով, բայց չի կարող աչք փակել վերջին տարիների իրադարձությունների վրա։
«2020-2023 թվականներին Ադրբեջանը, Թուրքիայի օգնությամբ, գրավեց Լեռնային Ղարաբաղը՝ ստիպելով ամբողջ հայ բնակչությանը լքել տարածաշրջանը։ Սա ոչ մի կերպ չի համապատասխանում հակամարտության կարգավորման երկարատև բանակցությունների ոգուն և չի համապատասխանում Ռուսաստանի շահերին։ Բնակչության վտարումը և հազարամյա պատմություն ունեցող հայկական վանքերի յուրացումը անընդունելի է», – ընդգծել է Կոնստանտին Զատուլինը։
Հայոց ցեղասպանության 110-ամյակին նվիրված իր ելույթում Զատուլինը կապել էր այդ իրադարձությունները ժամանակակից իրականության հետ։ Քաղաքական գործիչը անցյալի իրադարձությունները կապել էր Լեռնային Ղարաբաղից հայերի ներկայիս արտագաղթի հետ՝ այն անվանելով պատմական ողբերգության շարունակություն։
