ՀՀ ԱԳՆ-ն Ադրբեջանին առաջարկել է միջազգային փորձագետների ներգրավմամբ ստուգել Երևանի կողմից տրամադրված քարտեզների ճշգրտությունը։ Այսպես է Հայաստանի արտգործնախարարության մամուլի քարտուղար Անի Բադալյանն Armenia Today-ին մեկնաբանել Ադրբեջանի ԱԳՆ այն հայտարարությունը, թե հայկական կողմը ներկայացրել է ականապատ դաշտերի ոչ ճշգրիտ քարտեզներ։
Հայաստանի ԱԳՆ-ն ընդգծել է, որ Երևանը բազմիցս հայտարարել է, որ չկան «ավելի լավ կամ ավելի ճշգրիտ» քարտեզներ՝ չնայած նրան, որ «Ադրբեջանը շարունակաբար կասկածի տակ է դնում այդ քարտեզների ճշգրտությունը», հայտնել է Բադալյանը:
Նա հիշեցրել է, որ ՀՀ-ն «կարևորելով հումանիտար հարցերի հասցեագրումը»՝ Ադրբեջանին է տրամադրել ականապատ դաշտերի թվով 972 տեղեկամատյան՝ 2021 թվականի հունիսի 12-ին, հուլիսի 3-ին, հոկտեմբերի 19-ին, նոյեմբերի 1-ին և նոյեմբերի 29-ին:
Բադալյանը հավելել է, որ Հայաստանը հարցումների միջոցով կազմել և 2024թ. սկզբում Ադրբեջանին է փոխանցել ականապատ դաշտերի նոր տեղամատյաններ:
«Հայաստանը, ինչպես նախկինում, այնպես էլ այժմ պատրաստ է միջազգային փորձագետների ներգրավմամբ ստուգել այդ քարտեզների ճշգրտությունը»,- նշել է ԱԳՆ մամուլի խոսնակը։
Նա նաև հիշեցրել է, որ Արդարադատության միջազգային դատարանը միանշանակ մերժել է Հայաստանի նկատմամբ ժամանակավոր միջոց կիրառելու պահանջը, որով Ադրբեջանը Հայաստանին մեղադրում էր ականապատումների մեջ։
2024 թվականի հունվարին ՀՀ ԱԳՆ-ն Armenia Today-ին հայտնել էր, որ ականապատ դաշտերի նոր տեղեկամատյաններ են փոխանցվել ադրբեջանական կողմին։ Բաքուն Հայաստանին մեղադրել էր նախկինում տրամադրված քարտեզների անօգուտ և թերի լինելու մեջ։
