Վրաստանի խորհրդարանի նախագահ Շալվա Պապուաշվիլին արևմտյան երկրների դեսպաններին կոչ է արել դադարեցնել միջամտությունը հանրապետության ներքին գործերին, գրում է ՏԱՍՍ-ը։
«Ցավոք, անսովոր չափանիշ է դարձել, երբ դիվանագիտական ներկայացուցչություններից բոլորը ինչ-ինչ պատճառներով կարծում են, թե կարող են ազատորեն միջամտել Վրաստանի ներքին գործերին՝ չնայած իրենց նկատմամբ կիրառվող միջազգային իրավական սահմանափակումներին։ Մենք տեսնում ենք, որ օր-օրի անհիմն մեկնաբանություններ են արվում՝ կապված Վրաստանի հետ»,- լրագրողներին ասել է Պապուաշվիլին։
Նա հիշեցրել է դեսպաններին, որ նրանք ենթարկվում են դիվանագիտական հարաբերությունների մասին Վիեննայի կոնվենցիային։
«Բոլորը պետք է մնան դիվանագիտական հարաբերությունների մասին Վիեննայի կոնվենցիայի, մասնավորապես՝ 41-րդ հոդվածի շրջանակներում, որը պարտավորեցնում է չմիջամտել ընդունող երկրի ներքին գործերին»,- ընդգծել է Պապուաշվիլին։
Թբիլիսիում բողոքի ցույցեր են ընթանում 2024 թվականի նոյեմբերի 29-ին, երբ Վրաստանի վարչապետ Իրակլի Կոբախիձեն հայտարարել էր, որ Վրաստանի իշխանությունները ԵՄ-ի հետ բանակցություններ սկսելու հարցը չեն բարձրացնի մինչև 2028 թվականը։ 2024 թվականի դեկտեմբերի 27-ին ԱՄՆ-ն ֆինանսական պատժամիջոցներ էր կիրառել «Վրացական երազանքի» հիմնադիր Բիձինա Իվանիշվիլիի նկատմամբ, ըստ որի՝ Իվանիշվիլիի և «Վրացական երազանքի» գործողությունները քայքայել են ժողովրդավարական ինստիտուտները, թույլ են տվել ոտնահարել մարդու իրավունքները և զսպել հիմնարար ազատությունների իրականացումը Վրաստանում։ Ցույցերը շարունակվում են մինչ օրս։
