Արցախի վրա Ադրբեջանի հարձակման և հայերի էթնիկ զտումների մասին ռեպորտաժներից հետո կանադացի լրագրող և վերլուծաբան Նիլ Հաուերին արգելել են մուտք գործել Թուրքիա, X-ում հայտնել է լրագրողը։
Նրա խոսքով՝ Թուրքիա իր մուտքն արգելելու խնդրանքը կարող էր բխել Բաքվից։ 2020 թվականին նա առաջնագծից լուսաբանել էր 2020-ի 44-օրյա պատերազմն Արցախում։
«Կասկածներ ունեմ, որ այդ արգելքը կիրառել են Ադրբեջանի պահանջով կամ առնվազն այդ երկրի մասնակցությամբ։ Ես շատ եմ գրել Լեռնային Ղարաբաղում Ադրբեջանի գործողությունների և Ադրբեջանի նախագահ Իլհամ Ալիևի ռեժիմի կողմից իրականացվող էթնիկ զտումների մասին։ Հանգամանքն, ակնհայտորեն, Թուրքիայում ընկերներ ունենալու առիթ չի դարձել»,- գրել է Հաուերը։
Նա նոյեմբերի 24-ին Երևանից զբոսաշրջային այցով ժամանել է Ստամբուլի Սաբիհա Գյոքչենի անվան օդանավակայան։ Անձնագրային հսկողության ժամանակ լրագրողին հայտնել են, որ «սև ցուցակում է»։ Այնուհետև նրան 16 ժամով ձերբակալել են և հետ արտաքսել Հայաստան։ Մուտքի արգելքի պատճառը նրան չեն հստակեցրել։
Հաուերի խոսքով՝ մինչ այդ բազմիցս առանց որևէ խնդրի այցելել է Թուրքիա: Նա չի կասկածում, որ արգելքը կապված է լրագրողական աշխատանքի հետ։ Հաուերը հայտարարել է, որ շատ հազվադեպ է գրում Թուրքիայի մասին և չի անդրադառնում քրդական հարցերին կամ թեմաներին՝ կապված իսլամական քարոզիչ Ֆեթուլլահ Գյուլենի հետ, որին Թուրքիայի նախագահ Ռեջեփ Էրդողանը մեղադրում էր 2016 թվականին պետական հեղաշրջման փորձի մեջ: Նրա խոսքով՝ Թուրքիայում օտարերկրյա լրագրողների համար հենց այս թեմաներն են սովորաբար խնդիրներ առաջացնում։
Հաուերը հայտարարել է երկիր մուտքի արգելքը բողոքարկելու պլանների մասին, քանի որ վնասել են իր մասնագիտական ազնվությունը։
«Միակ բանը, որ ես չեմ պատրաստվում անել, իմ մասնագիտական ազնվությունը կամ իմ նյութերի բովանդակությունը վարկաբեկելու հետ հաշտվելն է: Չեմ պատրաստվում դա անել։ Այս իրավիճակում միակ դրական կետն այն է, որ իշխանություն ունեցող մեկը կարդում է իմ հոդվածները»,- եզրափակել է լրագրողը:
2020 թվականի 44-օրյա պատերազմի ընթացքում Հաուերը գտնվել էր Ստեփանակերտում, Շուշիում, Մարտունիում և Մարտակերտում, լուսաբանել պատերազմն ու դրա հետևանքները։ 2021 թվականի հունիսին նա Regional Post-ին պատմել էր հայ-ադրբեջանական պատերազմի լուսաբանման մասին և հայտարարել, որ Ադրբեջանը պետք է պատիժ կրի Լեռնային Ղարաբաղի հայերի դեմ սարսափելի պատերազմական հանցագործությունների համար։ Լրագրողը մասնագիտացած է հակամարտությունների լուսաբանման մեջ, որոնց վերաբերյալ նաև հետազոտական աշխատանքներ է կատարել։
