Ականապատ դաշտերի նոր տեղեկամատյանները հունվարի 26-ին փոխանցվել են ադրբեջանական կողմին, Armenia today-ի հարցմանն ի պատասխան հայտնել են ՀՀ ԱԳՆ-ից:
Գերատեսչությունը նշել է, որ, հաշվի առնելով Ադրբեջանի կողմից թեմայի անհարկի շահարկումները, ՀՀ-ն այդ տեղեկամատյանները տրամադրել է նաև որոշ միջազգային գործընկերների:
«Միջազգային գործընկերները ևս, ըստ անհրաժեշտության, կարող են ներգրավվել դրանց ճշգրտության հավաստման գործընթացին։ Իր հերթին՝ թեմայի շահարկման փոխարեն Ադրբեջանն ունի հնարավորություն փոխադարձել հումանիտար հարցերի կարգավորման հարցում հայկական կողմի մոտեցումը և ցուցաբերել վստահության ձևավորման ուղղությամբ իրական հանձնառություն»,- շեշտել են ՀՀ ԱԳՆ-ից։
Փետրվարի 12-ին ադրբեջանական լրատվամիջոցները հայտնել էին, որ Երևանը Բաքվին է փոխանցել ութ նոր տեղեկամատյան՝ Լեռնային Ղարաբաղի ականապատ դաշտերի մասին տեղեկություններով: Ադրբեջանի ականազերծման գործակալությունը (ANAMA) քննադատել էր քարտեզները և դրանք անվանել «ոչ ճշգրիտ»։
Հունվարի 25-ին ՀՀ ԱԱԾ-ն հայտարարել էր, որ առաջիկա օրերին աշխատանքային խողովակներով ադրբեջանական կողմին կփոխանցվեն ականապատ 8 նոր տեղեկամատյաններ: ԱԱԾ-ն ընդգծել էր, որ Հայաստանը նախկինում հրապարակայնորեն և աշխատանքային մակարդակով հայտարարել էր, որ իր տրամադրության տակ չունի ավելի որակյալ քարտեզներ, իսկ արդեն փոխանցված տվյալներն ստացվել են Լեռնային Ղարաբաղի զինվորական անձնակազմից։
Հունվարի 26-ին Ադրբեջանի ԱԳՆ-ն Հայաստանից պահանջել էր «բոլոր ականապատ տարածքների» ճշգրիտ քարտեզները։ Բաքուն Երևանի որոշումը չէր համարել «որպես վստահության ամրապնդման միջոց», և Ադրբեջանի ԱԳՆ-ն Հայաստանին մեղադրել էր նախկինում տրամադրված քարտեզների անօգուտ և թերի լինելու մեջ։
