Հունաստանի բնակչության շրջանում սոցհարցում է իրականացվել՝ պարզելու համար, թե հույներն ինչ վերաբերմունք ունեն Եվրամիության, ինչպես նաև օտարերկրյա տարբեր առաջնորդների նկատմամբ: Այս մասին հայտնում է Ermenihaber-ը։
«DiaNEOsis» վերլուծական կենտրոնի կողմից Հունաստանի ողջ տարածքում անցկացված հարցումները ցույց են տվել, որ հույների շրջանում ամենաքիչ աջակցությունը ստացել է Թուրքիայի նախագահ Ռեջեփ Թայիփ Էրդողանը՝ 5.7%։
Սոցհարցման տվյալները հրապարակած հունական «Kathimerini» թերթի անգլալեզու տարբերակում հրապարակված հոդվածում նշվել է, որ միանգամայն սպասելի էր, որ Էրդողանը հույների շրջանում պիտի ունենար ամենացածր վարկանիշը։
Ամենամեծ աջակցությունը ստացել է Ֆրանսիայի նախագահ Էմանուել Մակրոնը՝ վաստակելով հարցվածների 65%-ի համակրանքը: Հարցվածների 64%-ը աջակցություն է հայտնել Եվրամիությանը, 34%-ը՝ դեմ արտահայտվել:
Հարցվածների շրջանում զգալի աջակցություն է ստացել նաև Ուկրաինայի նախագահ Վոլոդիմիր Զելենսկին: Ռուսատանի ու Չինաստանի նախագահներ Վլադիմիր Պուտինն ու Սի Ցզինպինը համեմատաբար ավելի փոքր մասի մոտ են համակրանք առաջացնում, համապատասխանաբար՝ 18.8 և 18.5 տոկոսով:
