Հայաստանի մի խումբ հասարակական-քաղաքական գործիչներ սկսել են քննարկել վարչապետ Նիկոլ Փաշինյանի իմփիչմենթի նախաձեռնությունը, Սահմանադրական դատարանի աշխատակազմի նախկին ղեկավար Էդգար Ղազարյանը միջնորդի դեր է կատարում տարբեր ուժերի միջև, գրում է «Հրապարակ» թերթը։
Ըստ կայքի՝ Ղազարյանն արդեն հանդիպել է նախկին նախագահներ Ռոբերտ Քոչարյանի և Սերժ Սարգսյանի, «Սրբազան պայքար» շարժման առաջնորդ Բագրատ արքեպիսկոպոս Գալստանյանի և այլ ընդդիմադիրների հետ։
«Որոշել են պատգամավորների կարծիքները ճշտել` ուղիղ եթերով ցուցադրելով, թե ընդդիմադիրներից յուրաքանչյուրն ի՞նչ կարծիք ունի անվստահության գործընթացի մասին և պատրա՞ստ է գնալ այդ քայլին, թե՞, ինչպես Ղազարյանն է ասել, սատարում են Նիկոլ Փաշինյանին»,- ասվում է հրապարակման մեջ։
ՍԴ աշխատակազմի նախկին ղեկավարը հրաժարվել է մանրամասներ հայտնել հանդիպումներից՝ պատճառաբանելով, որ քննարկումների բովանդակությունը հրապարակելու համաձայնություն նախագահներից և արքեպիսկոպոսից չի ստացել, սակայն նշել է, որ հանդիպումները շարունակվելու են։
Մարտի 28-ին «Պատիվ ունեմ» խմբակցության քարտուղար Տիգրան Աբրահամյանը չէր բացառել Փաշինյանի դեմ իմփիչմենթի գործընթացի մեկնարկը խորհրդարանում և նշել, որ դա կախված կլինի «փողոցում առկա իրավիճակից»։
2024 թվականի մայիսին Հայաստանում վարչապետի հրաժարականի պահանջով բողոքի ցույցեր էին տեղի ունենում։ «Տավուշը հանուն հայրենիքի» ընդդիմադիր շարժման առաջնորդ Գալստանյանը մայիսի 9-ին հայտարարել էր Փաշինյանի դեմ իմփիչմենթի գործընթաց սկսելու մասին։ Ավելի ուշ ԶԼՄ-ները հայտնել էին, որ խորհրդարանական ընդդիմությունը որոշել է չշտապել՝ «մինչև բոլոր ռիսկերը չվերացվեն»։ Իմպիչմենթի հարցը խորհրդարանում ներկայացնելու համար անհրաժեշտ էր 36 պատգամավորի ստորագրություն, իսկ ընդունման համար՝ 54։
